Í þessum áfanga rannsaka nemendur eðli og eiginleika lofthjúps jarðar, hafsins og jökla. Fjallað er ítarlega um veður, úrkomu, lægðir og önnur fyrirbrigði andrúmsloftsins, loftslag og loftslagsþróun, myndun og bráðnun jökla og tengsl við jarðsögu ísaldar á Íslandi. Nemendur vinna einnig verkefni um kenningar um loftslagsbreytingar og áhrif mannsins á veðurfar og geislun.
Meðal efnisþátta eru efnasamsetning og lagskipting lofthjúpsins, geislun, hiti og orka lofthjúpsins, þrýstingur, vindar og vindakerfi, myndun skýja og úrkomu, loftmassar og skil, lægðir og hæðir, loftslag og loftslagsrannsóknir, loftslags- og gróðurbelti, loftslagsbreytingar, ísaldir, hafið og hafsbotninn, selta, sjávarhiti, sjávarstraumar, hafís, hafefnafræði, lífsskilyrði í sjónum, eðli og hreyfing jökla, ísaldir og orsakir þeirra, gróðurhúsaáhrif og ósoneyðing.
engar
Nemandi skal hafa öðlast þekkingu og skilning á:
eðli, samsetningu og lagskiptingu lofthjúps jarðar
helstu ferlum sem valda veðrum
loftslags- og gróðurbeltum
loftslagsbreytingum og orsökum þeirra
helstu einkennum hafstrauma og sjávargerða við Ísland
helstu breytiþáttum sjávar og sjávarstraumum
eðli og mismunandi gerðum jökla,
kenningum um orsakir ísalda kulda- og hlýskeiða
Nemandi skal hafa öðlast leikni í að:
greina veðurkort, s.s. áætla vindstyrk og vindstefnu út frá jafnþrýstilínum
greina veðurfarsupplýsingar og setja fram á myndrænan hátt
segja til um áhrif seltu og hita á hafstrauma
spá fyrir um hafísdreifingu við landið
fjalla um ástand sjávar og mikilvægi þess fyrir lífríkið
fjalla um veðurlag út frá stöðu veðrakerfa í nágrenni landsins
Nemandi skal geta hagnýtt þá almennu þekkingu og leikni sem hann hefur aflað sér til að:
sýna sjálfstæð og öguð vinnubrögð í upplýsingaöflun, mati, úrvinnslu og framsetningu veðurgagna
meta veðurfar og veðurfarsbreytingar og áhrif þeirra á lífsskilyrði á Íslandi og í heiminum
gera einfaldar veðurspár byggðar á eigin athugunum, veðurkortum og veðurlýsingum
leggja rökstutt mat á umfjöllun um loftslagsbreytingar á jörðinni og þær leiðir sem bjóðast til að sporna við þeim
Námsmat er útfært í kennsluáætlun í samræmi við skólanámskrá.