Lokaverkefni eru einstaklingsverkefni sem ætlað er að þjálfa nemendur í að beita viðurkenndum aðferðum við heimildavinnu og rannsókn eða lausn viðfangsefna og undirbúa þá undir verkefnavinnu í háskólanámi. Ríkar kröfur eru gerðar um sjálfstæði og vönduð vinnubrögð. Nemendur kynna viðfangsefni sín á málstofu.
Einungis nemendur sem komnir eru að námslokum fá að sitja áfangann.
Nemandi skal hafa öðlast þekkingu og skilning á:
tilteknu viðfangsefni sem hann hefur valið sér
byggingu heimilda- og rannsóknarritgerða
nauðsyn þess að vanda meðferð heimilda
reglum um höfundarrétt og hugmyndum um ritstuld
Nemandi skal hafa öðlast leikni í að:
afla fjölbreyttra heimilda, t.d. skráðra heimilda úr bókum, tímaritum og af netinu eða frumheimilda, ef svo ber undir
vinna með og leggja mat á upplýsingar úr heimildum á sjálfstæðan og gagnrýninn hátt
fylgja viðurkenndum reglum við gerð og frágang ritgerðar
skrifa skýran og greinargóðan texta
tjá sig, í ræðu og riti, á gagnrýninn og skapandi hátt um sérhæft efni
Nemandi skal geta hagnýtt þá almennu þekkingu og leikni sem hann hefur aflað sér til að:
gera raunhæfa verkáætlun og framfylgja henni
setja fram rökstudda rannsóknarspurningu eða efnisyfirlýsingu
skrifa lokaritgerð samkvæmt viðurkenndum aðferðum
Leiðsagnarmat þar sem vinna nemanda í áfanganum er metin með reglubundnum hætti. Til grundvallar matinu eru einkum verkáætlun nemanda, sjálfstæði í vinnubrögðum, efnistök, mál og stíll, meðferð heimilda og frágangur verkefnis.