Áfanginn er hannaður til að ýta undir og efla alþjóðasamskipti nemenda sem eru að læra erlend tungumál. Meginviðfangsefnið felst í að nota upplýsinga- og margmiðlunartækni til að tengjast nemendum í öðrum löndum og vinna að samvinnuverkefnum gegnum alþjóðlegar menntaáætlanir s.s. etwinning og Comenius.
Nemendur munu fá tækifæri til að meta eigin færni í erlendum tungumálum í samskiptum við jafningja sína gegnum sameiginlegt matsverkfæri, evrópsku tungumálamöppuna. Hæfni í lestri, ritun, ræðu og hlustun er efld með þverfaglegri vinnu, bæði gegnum vinnu í námsefni og með margmiðlunartækni.
Námið í þessum áfanga eykur menningarlæsi og fjölmenningarmeðvitund nemenda auk meðvitundar þeirra um eigin menningu. Ennfremur efla nemendur félags- og borgaravitund sína, auk þess sem þeir þjálfast í samskiptatækni.
Nemandi skal hafa öðlast þekkingu og skilning á:
mismunandi málnotkun og áherslum í samskiptum við fólk frá öðrum löndum
sterkum og veikum hliðum sínum í samskiptum á erlendu tungumáli gegnum vinnu í samvinnuverkefnum
mikilvægi menningar- og borgaravitundar þegar samskipti fara fram í alþjóðlegu umhverfi
nauðsyn sterkrar undirstöðu í málnotkun svo sem málfræði og orðaforða á erlendu tungumáli
hlutverki samvinnu þegar unnið er að samstarfsverkefnum
samskiptatækni sem eflir miðlun upplýsinga milli landa
Nemandi skal hafa öðlast leikni í að:
vinna með jafningjum sínum í öðrum löndum að sameiginlegu verkefni
nota þau tungumál sem hann hefur lært til samskipta
gera grein fyrir niðurstöðum verkefna í ræðu og riti á erlendu tungumáli sem hann hefur lært
nýta sér upplýsingatækni
umgangast fólk á öðrum menningarsvæðum og virða siði þess og venjur
Nemandi skal geta hagnýtt þá almennu þekkingu og leikni sem hann hefur aflað sér til að:
skilja menningarmun og aðlaga sig ólíkum aðstæðum í alþjóðlegum samskiptum
nýta þekkingu á erlendu tungumáli til að undirbúa vinnuskjöl s.s. kynningar, ritgerðir, myndbönd
túlka samskipti á erlendu tungumáli
nota internetið og aðra margmiðlunartækni til að efla samskipti og samvinnu við nemendur í öðrum löndum
beita sjálfstæðum vinnubrögðum við einstaklings- og hópverkefni