ÞÝSK 2AM05 er annar þýskuáfanginn á öðru þrepi og er hann á þrepi B1 í samevrópska matsrammanum. Í undanförum eiga nemendur að hafa öðlast þekkingu á og leikni í beitingu allra helstu málfræðiatriða þýskrar tungu. Nú er ætlast til að þeir nýti sér þessa kunnáttu til að tjá sig á markvissari hátt og auðga mál sitt í ræðu og riti. Aðeins þyngstu málfræðiatriðin verða rifjuð upp svo sem tilvísunarsetningar, þolmynd og viðtengingarháttur. Eitt nýtt atriði verður kynnt og æft. Það er í raun viðbót við viðtengingarháttinn eða notkun hans í óbeinni ræðu. Orðaforði daglegs lífs er dýpkaður og aukinn og meiri áhersla er lögð á umfjöllun um valin málefni líðandi stundar hér heima og erlendis, menningu og sögu þýskumælandi landa. Unnið er með texta á netinu, bókmenntatexta, tónlist og stutt myndbönd (Deutsche Welle). Lesin er ein skáldsaga og margvísleg munnleg og skrifleg verkefni unnin í tengslum við hana. Þá er horft á eina kvikmynd sem nemendur fjalla um í tímaritgerð og tjá sig um á munnlegu prófi. Nemendur vinna að miklum hluta sjálfstætt m.a. við verkefni að eigin vali. Áhersla er lögð á að þjálfa nemendur í að halda stuttar kynningar á þýsku þar sem þeir segja frá völdum verkefnum. Verkefnum safna nemendur saman í annað hvort rafræna eða hefðbundna verkefnamöppu. Leitast verður við að hafa öll verkefni áfangans í rafrænu formi. Á þessu stigi þýskunámsins er æskilegt að nemendur þjálfist í erlendu samstarfi með þýsku sem samskiptamál.
ÞÝSK2FM05
Nemandi skal hafa öðlast þekkingu og skilning á:
orðaforða sem nauðsynlegur er til þess að ná hæfnimarkmiðum áfangans
menningu og sögu þýskumælandi landa
stjórnskipan og uppbyggingu samfélaga á þýska menningarsvæðinu
flóknari þáttum málkerfisins til að mæta hæfniviðmiðum þrepsins munnlega og skriflega
Nemandi skal hafa öðlast leikni í að:
lesa ólíkar textagerðir, beita lestraraðferðum við hæfi og vinna sjálfstætt úr efninu á skipulegan hátt
skilja texta með algengum orðaforða eða orðaforða sem tengist eigin áhugasviði án hjálpar orðabókar
ná aðalatriðum í útvarps og sjónvarpsþáttum um málefni líðandi stundar eða efni sem tengist áhugasviði hans
taka virkan þátt í daglegum samskiptum á viðeigandi hátt og beita málfari við hæfi
halda stutta kynningu eða segja skilmerkilega frá undirbúnu efni
skrifa lengri samhangandi texta þar sem fjallað er t.d.um persónulega reynslu, útdrátt úr bók eða kvikmynd og lýsa skoðun sinni á efninu
nota málfræðiatriði sem hann lærði í undanförum til að tjá sig á markvissari hátt og auðga mál sitt
Nemandi skal geta hagnýtt þá almennu þekkingu og leikni sem hann hefur aflað sér til að:
skilja daglegt mál ef talað er skýrt og bregðast rétt við
tileinka sér aðalatriðin í samtölum, kvikmyndum og meðalþungu efni í fjölmiðlum, hvort sem hann þekkir efnið eða ekki
skilja án vandkvæða megininntak samtala og umfjöllunar, jafnvel um tiltölulega flókið efni, ef hann þekkir vel til þess
lesa og skilja meginefni lengri texta með almennum orðaforða og geta dregið ályktanir þótt efnið sé ekki kunnugt
takast á við flestar aðstæður sem geta komið upp á ferðalagi um svæði þar sem málið er talað
taka þátt í samræðum um þekkt efni sem tengist áhugasviði eða daglegu lífi án undirbúnings
segja skírt og skilmerkilega frá undirbúnu eða vel þekktu efni, tjá skoðun sína og rökstyðja mál sitt
skrifa lengri samfelldan texta um afmarkað efni almenns eða persónulegs eðlis og gera grein fyrir skoðun sinni
nýta sér öll helstu grundvallaratriði þýskrar málfræði í ræðu og riti