Í þessum framhaldsáfanga er þeirri spurningu velt upp hvernig lífið á jörðinni hefur þróast. Þróunarkenning Darwins verður skoðuð og ýmsar nýjar hugmyndir í þróunarfræði krufðar. Einnig verður erfðafræðin tekin fyrir og skoðuð í samhengi við þróun. Stiklað verður á stóru í sögu erfðafræðinnar, frá fyrstu hugmyndum um erfðir, gegnum Mendel, til erfðatækni nútímans. Meðal efnistaka eru gen, litningar, frumuskipting, víkjandi, ríkjandi og kyntengdar erfðir, stökkbreytingar og bygging DNA og RNA.
LÍFF2LM05 OG LÍFF2GD05 (LÍF2A05/LÍF2B05)
Nemandi skal hafa öðlast þekkingu og skilning á:
grunnatriðum þróunarkenningar Darwins
náttúruvali
grunnatriðum Mendelskrar erfðafræði
litningum og genum
stökkbreytingum
byggingu DNA
grundvallaratriðum í erfðatækni
tengslum erfða og þróunar
Nemandi skal hafa öðlast leikni í að:
skilja hugtök í erfðafræði og þróunarfræði á íslensku og ensku
setja fram tilgátur um tilurð þróunarfræðilegra fyrirbæra
skoða ættartré til að rekja erfðir
meta erfðafræðilegar siðferðisspurningar á ábyrgan hátt
velja úr safni heimilda og nýta þær til að koma eigin texta til skila á skilmerkilegan máta.
Nemandi skal geta hagnýtt þá almennu þekkingu og leikni sem hann hefur aflað sér til að:
meta erfðafræðilegar og þróunarfræðilegar upplýsingar á gagnrýninn hátt
taka þátt í upplýstri umræðu um erfðatækni
skiptast á skoðunum við aðra um lausnir og útskýra hugmyndir sínar og verk skilmerkilega í mæltu máli og myndrænt
dýpka skilning sinn á erfðafræði og þróun til gagns og ánægju
Leiðsagnarmat. Fjölbreytt verkefni metin jafnt og þétt yfir önnina. Áhersla á umsagnir sem leiða nemandann áfram. Engin skrifleg lokapróf.