Farið verður yfir:
Tölfræði : grunnatriði tölfræðinnar skoðuð. Hvað eru gögn og hvernig má vinna tölfræðilegar upplýsingar úr þeim? Framsetning gagna og einföld tölfræðileg próf.
Líkindareikningur og talningafræði: einfaldur líkindareikningur og talningafræði í leik og starfi.
Fjármálalæsi og hugtök því tengt; vextir, vaxtavextir, vísitölur, vísitölutengingar, verðbólga o.fl. Hvað stendur á launaseðlinum þínum? Hvað þarf að hafa í huga þegar þú tekur lán?
Lífeyrissparnaður og viðbótasparnaður (til hvers?)
Kennslufyrirkomulag - kennsluaðferðir:
Hópvinnutímar með umræðum og stuttum fyrirlestrum, þar sem áhersla er lögð á að kryfja efnið til að dýpka skilning. Nemendur vinna verkefni frá kennara saman í hóp eða einir eins og hverjum hentar en skila sjálfstæðum verkefnum á tveggja til þriggja vikna fresti. Kennsluaðferðin er verkefnamiðað nám þar sem kennsla og námsmat eru samofin.
STÆR2FF05
Nemandi skal hafa öðlast þekkingu og skilning á:
einföldum mengjareikningi
grunnhugtökum talningafræði
líkindareikningi í endanlegu líkindarúmi með jafndreifðum líkum
einkennishugtökum úr lýsandi tölfræði
gagnasöfnun og flokkun gagna
tíðni, miðsækni og dreifingu
notkun töflureiknis og GeoGebru í tölfræði
grunnhugtökum fjármálalæsis
launaútreikningum, vöxtum, verðbólgu og vísitölum.
Nemandi skal hafa öðlast leikni í að:
safna gögnum og greina eðli þeirra
meta heppilega flokkun og framsetningu á tölulegum upplýsingum
líta gagnrýnum augum á tölfræði daglegs lífs
reikna tíðni, miðsækni og dreifingu á mismunandi hátt
meta eða finna líkur á ýmsu sem fyrir kemur í daglegu lífi
nota forrit til að leysa ýmis reikningsleg viðfangsefni
reikna launaseðla og vaxtakjör
greina hvað liggur að baki tölum úr fjármálaheiminum.
Nemandi skal geta hagnýtt þá almennu þekkingu og leikni sem hann hefur aflað sér til að:
skrá lausnir sínar skipulega, skiptast á skoðunum við aðra um þær og útskýra hugmyndir sínar og verk skilmerkilega á viðeigandi hátt
átta sig á tengslum ólíkra aðferða við framsetningu stærðfræðilegra hugmynda og viðfangsefna
skilja merkingu og tengsl hugtaka í námsefninu og vinna með þau
geta fylgt og skilið röksemdir og röksamhengi í mæltu máli og texta
beita skipulegum aðferðum við að leysa úr viðfangsefnum og þrautum, s. s. út frá þekkingu á lausnum svipaðra þrauta, unnið til baka frá þekktum stærðum eða með því að setja upp jöfnur
takast á við stærðfræðileg verkefni með opnum og jákvæðum huga
taka fjárhagslega ígrundaðar ákvarðanir í lífinu.
Leiðsagnarmat. Fjölbreytt verkefni metin jafnt og þétt yfir önnina. Áhersla á umsagnir sem leiða nemandann áfram. Engin skrifleg lokapróf.