Mannkynssaga frá Landbúnaðarbyltingu til frönsku byltingarinnar. Aðaláhersla er lögð á fornaldarmenningu, helstu trúarbrögð, þróun stjórnarfars, þær breytingar sem verða í kringum upphaf nýaldar og breyta heimssýn mannsins sem og upplýsingu og byltingar í kjölfar hennar.
Kennsluaðferðir eru í meginatriðum þrenns konar. Í fyrsta lagi eru fyrirlestrar kennara þar sem námsefnið er reifað og hugtök útskýrð. Þá eru umræður og loks verkefnavinna nemenda; úr námsefninu sjálfu eða öðru sem því tengist. Gert er ráð fyrir að nemendur sæki kennslustundir og taki virkan þátt í umræðum og verkefnavinnu.
Grunnskólapróf
Nemandi skal hafa öðlast þekkingu og skilning á:
• mikilvægi ferlis frá lestri, skilningi á námsefninu til aukinnar kunnáttu í sögu
• vinnbrögðum sagnfræðinnar
• mikilvægi skapandi hugsunar við lestur og greiningu sögunnar
• mikilvægi gagnrýninnar hugsunar við lestur og greiningu sögunnar
• helstu atburðum, hugmyndum og persónum, sem mótað hafa framvindu sögunnar frá fornöld til frönsku byltingarinnar
• helstu hugtökum sem þekkja þarf til að tjá sig um söguna
Nemandi skal hafa öðlast leikni í að:
• nálgast söguna á skipulagðan hátt, nýta til þess ólíkar heimildir og geti metið gildi þeirra
• tjá sig um, kynna og rökstyðja einstök verkefni í hóp, í fyrirlestri eða ritgerð
• tengja einstaka atburði sögulegri þróun
• tengja nútíð og fortíð eins og hvað á bygging Hörpunnar í Reykjavík skylt við byggingu píramídanna í Egyptalandi
Nemandi skal geta hagnýtt þá almennu þekkingu og leikni sem hann hefur aflað sér til að:
• draga fram og setja atburði úr fortíð í samhengi við samtímann
• vinna kynningar á afmörkuðu efni á skipulagðan hátt með réttri heimildaskráningu samkvæmt reglum þar um
• beita öguðum vinnubrögðum, taka ábyrgð á eigin námi og vinna í samvinnu við aðra
• lesa og túlka landakort, myndir og texta
• beita upplýsingatækni í þekkingarleit sinni
• meta gildi vettvangsskoðunar út frá skynrænum upplifunum
• njóta lista, menningar og samfélagsumræðu og tengja það sögulegri þekkingu sinni