Áfanginn er tekinn á fyrsta ári. Honum er ætlað að skerpa sýn nemenda og auka áhuga þeirra á samfélagi, sögu, nærumhverfi og náttúru nágrennisins Í áfanganum fléttast saman námsgreinar eins og saga, félagsfræði, náttúrufræði og landafræði sem á að auka læsi þeirra á nærumhverfi sitt. Áhersla er lögð á að nemendur tileinki sér vönduð og skapandi vinnubrögð og gagnrýna hugsun við fjölbreytta verkefnavinnu. Áfanginn byggist að verulegu leyti á verkefnavinnu í kennslustundum þar sem nemendur vinna verkefni sín undir leiðsögn kennara. Námið fer fram bæði innan og utan skólans og sækja nemendur sér fróðleik og gögn á fjölbreytta vegu, meðal annars í vettvangsferðum. Virk þátttaka nemenda í eigin námi liggur til grundvallar og því er mikið lagt upp úr að auka áhuga þeirra á umhverfi sínu og náminu almennt. Einkunnarorð áfangans eru samvinna og ábyrgð
Nemandi skal hafa öðlast þekkingu og skilning á:
helstu hugtökum eins og kosningaréttur, sjálfræði, lýðræði og samfélag, lýðveldi, fjölmenning, sjálfbærni, auðlindir, landnýting, vistfræði og náttúruhamfarir
einkennum gróðurfars og jarðfræði svæðisins
áhrifum mannsins á náttúruna og samfélagið
eigin ábyrgð og hlutverki í samfélagi manna
byggðaþróun og atvinnulíf í heimabyggð
viðfangsefnum sem eru áberandi í þjóðfélagsumræðu á hverjum tíma í tengslum við markmið áfangans
skólakerfinu og stöðu eigin skóla í samfélaginu
Nemandi skal hafa öðlast leikni í að:
afla sér upplýsinga um umhverfi sitt og samfélag
gera sér grein fyrir stöðu sinni í eigin menningarsamfélagi með það að markmiði að vera virkur þjóðfélagsþegn
greina og flokka ýmis samfélagsvandamál eins og stéttskiptingu og fordóma
kynna málefni úr fréttum eða fjölmiðlum út frá samfélagi, sögu, landafræði eða náttúrufræði fyrir samnemendum sínum
skipuleggja vettvangsferð eða heimsókn tengda efni áfangans
Nemandi skal geta hagnýtt þá almennu þekkingu og leikni sem hann hefur aflað sér til að:
meta upplýsingar og vinna með þær á gagnrýnan hátt þannig að þær skili honum þekkingu og aukinni hæfni til náms í náttúrufræði og samfélagsfræði
geta gert sér grein fyrir sjónarmiðum sínum og skoðunum, geti skipst á skoðunum við aðra og útskýrt hugmyndir sínar fyrir samnemendum
geta tekið fordómalausa afstöðu í samfélagsmálum og rætt hana á lýðræðislegan hátt
draga skynsamlegar ályktanir um samfélagslega, menningarlega og vistfræðilega ábyrgð sína og hve mikilvægt framlag hvers einstaklings er
greina stöðu sína í umhverfinu sem hann lifir í, bæði samfélaginu og náttúrulegu umhverfi
gera sér grein fyrir hvað felst í að vera ábyrgur samfélagsþegn
skilja mikilvægi þess að jafnrétti ríki í verkefnavinnu og umræðum
Þekking, leikni og hæfni verða metin með fjölbreyttum hætti. Má þar nefna leiðsagnarmat þar sem lögð er áhersla á leiðbeinandi endurgjöf, markvissar spurningar, sjálfs- og jafningjamat. Námsmat gæti til dæmis falist í því að meta leiðarbækur nemenda, námsmöppur, þátttöku og virkni þeirra t.d. í umræðum og hópastarfi en auk þess kannanir og próf þegar það á við