Í áfanganum lærir nemandinn að vinna með mismunandi gerðir vefstóla og einnig myndvefnaðarramma. Hann lærir að setja upp vef í ramma og tekur virkan þátt í uppsetningu á vef í vefstól og kynnir sér uppbyggingu hans sem tækis til vefnaðar og hvernig uppistaðan binst ívafinu á margbreytilegan hátt. Nemandinn lærir að þekkja muninn á band-, þráðar- og jafnþráðaáferð í vefnaði, kynnist þessum þrem áferðum og lærir að þekkja muninn á þeim. Áhersla lögð á m.a. einskeftu, vaðmál, rósabandavefnað, pokavoð og íslenskan glitvefnað. Miðað er við að notuð séu fjögur til fimm sköft og fjögur til sex skammel. Nemendur tileinki sér notkun fagorða, fái þjálfun og tilfinningu fyrir því hvaða textíltrefjar henta hverjum vef. Lögð er áhersla á að nemendur fái góða innsýn í bindifræði og haldi vinnumöppu allan áfangann.
TEXL1TH03
Nemandi skal hafa öðlast þekkingu og skilning á:
mikilvægi vefnaðar í lífinu almennt og menningarlegu gildi hans, sérkennum og sögu
mismunandi tækjum og tólum sem tilheyra vefnaði og kynnist fagtungumáli og þeim hugtökum sem notuð eru í vefnaði
frumbindingum í vef, þ.e. einskeftu, vaðmáli og ormeldúk
íslenskum glitvefnaði og munsturgerð fyrir hann
hinum mismunandi þráðum sem notaðir eru í vefnaði, s.s. endurnýtanlegt efni, ullarband, bómull og hör og þekki stigtölur/lotunúmer mismunandi vefjarefna
því bindifræðiforriti sem notað er í vefnaði áfangans
mismunandi inndráttarmunstrum og uppbindingum fyrir t.d. einskeftu og vaðmál, rósaband, salúnvefnað og litafléttur í einskeftu og vaðmáli og hvaða þýðingu þau hafa
muninum á uppbindimunstrum og stigmunstrum
Nemandi skal hafa öðlast leikni í að:
reikna út í slöngu með mismunandi vefjarefnum fyrir einfaldar bindingar
beita bindifræðiforriti fyrir vefnað á sjálfstæðan og skapandi hátt
rekja í slöngu
þræða í forskeið og reikna út í hana
rifja í vefstól og setja upp vef í vefstól í samvinnu við nemendur og kennara
spóla mismunandi vefjarefni á garnvindu, dokkuvindu og spólurokk
vefa einfaldar prufur í band-, þráðar- og jafnþráðaáferð
beita líkamanum á réttan hátt við vinnu sína og verklag í vefnaði
beita skapandi aðferðum í vefnaði, t.d. með lita- og efnisnotkun
hanna munstur fyrir íslenskan glitvefnað og rósabandavefnað
Nemandi skal geta hagnýtt þá almennu þekkingu og leikni sem hann hefur aflað sér til að:
nýta sér mismunandi aðferðir og verkkunnáttu í vefnaði og bindifræði
öðlast nokkurt sjálfstraust í útfærslu og túlkun hugmynda og verkefna undir leiðsögn kennara
vera fær um að taka þátt í uppbyggilegri og frjórri samræðu um verk sín og annarra í vefnaði, geti ígrundað og rökstutt lita- og efnisval sitt bæði í verklegum og tæknilegum útfærslum í bindifræði og vefnaði
gera sér grein fyrir styrk sínum og nýti sér hann að nokkru leyti í verkefnavali undir leiðsögn kennara
Símatsáfangi þar sem öll vinna nemandans í vefnaði á önninni er metin. Við námsmat er horft m.a. til vinnulags og vandvirkni við alla þætti vinnuferlisins. Vinnusemi, skipulag og vilji til sjálfstæðra vinnubragða eru mikilvæg atriði. Öllum verkefnum, ásamt vinnumöppu í bindifræði, er skilað til lokamats í lok annar.