Í áfanganum er lagður grunnur að þekkingu nemenda á eðlisfræðilegum lögmálum í tengslum við sérnám þeirra í bíliðngreinum. Fjallað er um hin þrjú lögmál Newtons, tregðu, kraft og heildarkraft. Fjallað er um þverkraft, núningskraft og núningsstuðul, massa og þyngd, vinnu, afl, hreyfiorku, stöðuorku, varðveislu orkunnar, varma, nýtni véla og jafngildi massa og orku. Ennfremur er farið í þrýsting í vökva og lofti samkvæmt reglu Pascals og uppdrif samkvæmt lögmáli Arkimedesar.
Nemandi skal hafa öðlast þekkingu og skilning á:
SI einingakerfinu og afleiddum stærðum þess
fyrsta, öðru og þriðja lögmáli Newtons
reglu Pascals um þrýsting í vökva
lögmáli Arkimedesar um uppdrif
helstu orkuformum og breytingu eins orkuforms í annað
Nemandi skal hafa öðlast leikni í að:
leysa verkefni um varðveislu orkunnar m.a. um breytingu stöðuorku í hreyfiorku og hreyfiorku í varma
reikna nýtni vélar út frá gefnum forsendum
nota reglu Pascals og lögmál um þrýsting í vökva til að útskýra hvernig loftvogir og vökvalyftur vinna og geti reiknað út einföld dæmi um þrýsting í vökva
nota lögmál Arkimedesar til að reikna út uppdrif hluta
Nemandi skal geta hagnýtt þá almennu þekkingu og leikni sem hann hefur aflað sér til að:
teikna og reikna út kraftamyndir á skáfleti
reikna núningskraft út frá núningsstuðli
útskýra mismuninn á massa hlutar og þyngd hans
Verklegt mat; nemandinn sýnir þekkingu sína og hæfni með því að lýsa SI kerfinu, lögmáli Newtons og Arkimedesar og reglu Pascals með því að tiltaka og sýna dæmi. Skriflegt mat; nemandinn leysir próf þar sem reiknaðar eru stærðir varðandi massa og þyngd, vinnu, afl, hreyfiorku, stöðuorku, varðveislu orkunnar, varma, nýtni véla og þrýsting í vökva og lofti.