Framhaldsskólar

Ný lög um framhaldsskóla, sem Alþingi samþykkti á 135. löggjafarþingi, fela í sér veigamiklar breytingar á skipulagi náms á framhaldsskólastigi. Lögin er afrakstur af vinnu sem unnin hefur verið á undanförnum árum og lýtur að því að endurskoða lögbundna skipan framhaldsskólastigsins og leggja drög að breytingum á henni, þar sem náið tillit er tekið til endurskoðunar laga sem varða önnur skólastig.

• Réttur nemenda til skólavistar og náms styrktur með fræðsluskyldu til 18 ára aldurs
• Gildi stúdentsprófs sem undirbúnings fyrir háskólanám óskorað en framhaldsskólum gefinn kostur á að byggja upp sveigjanlegt námsframboð hvað inntak og skipulag náms varðar
• Skipulag skólastarfs miðist við kröfur og væntingar nemenda, sveigjanleiki námsskipulags stóraukinn, námsleiðum fjölgað og skilyrði sköpuð fyrir fleiri til að ljúka skilgreindu námi
• Ráðgjöf og stuðningur við nemendur efldur
• Framhaldsskólum veitt frelsi til að þróa sérstakar námsbrautir sem byggja á sérstöðu þeirra og styrkleika og spurn eftir sérhæfðum námsleiðum og úrræðum
• Dregið úr miðstýringu á námsframboði og í námskrárgerð
• Aukið svigrúm og sveigjanleiki við gerð námsbrautarlýsinga með nýju einingamatskerfi
• Mat á vinnu nemenda í öllu námi á framhaldsskólastigi gert gagnsætt og stúdentspróf á bóknáms- og verknámsbrautum jafngilt
• Menntastofnunum falin aukin ábyrgð á að þróa námsframboð á mörkum skólastiga til að auka sveigjanleika og möguleika nemenda við flutning milli skólastiga
• Leitast við að tryggja hag og stöðu nemenda í iðn- og verknámi, og starfsnámi almennt, m.a. með því að framhaldsskólar beri ábyrgð á vinnustaðanámi
• Leitast við að tryggja gæði náms með því að stórefla mat og eftirlit og með stuðningi við umbætur í skólastarfi