Áfanginn er kynning á nokkrum helstu viðfangsefnum veðurfræðinnar. Farið er í grunnatriði veðurfræðinnar. Í áfanganum er lögð áhersla á að nemendur öðlist skilnings á lofthjúpi jarðar, lagskiptingu hans og helstu einkennum. Í áfanganum er farið í hvernig mismunandi veðrakerfi verða til og þróast og hvernig staðsetning veðurkerfa og landslag hefur áhrif á veðurfar á hverjum stað. Nemendur læra að lesa í veðurkort, og nýta sér vefsíður til að draga ályktanir um veðurfar. Nemendur læra um helstu hafstrauma jarðarinnar og samspil hafstrauma og veðurkerfa. Farið er yfir veðurfarsbreytingar og sveiflur bæði af náttúrulegum- og af mannavöldum og hugmyndir vísindamanna um þróun veðurfars á jörðinni. Tekið er fyrir hafsvæðið umhverfis Ísland, sjóalög og áhrif sjávar á vöxt og viðgang nytjastofna við landið. Þá er lögð áhersla á greiningu helstu gróðursvæða hér á landi og skilning á því hvaða veðurfarsþættir hafa áhrif á útbreiðslu þeirra.
Engin undanfari
Nemandi skal hafa öðlast þekkingu og skilning á:
efnasamsetningu, lagskiptingu, og eðliseiginleikum lofthjúps jarðar,
kröftum sem stjórna hreyfingu lofts og áhrif þeirra á vindhraða og stefnur,
mismunandi skýjagerðum og flokkun þeirra,
vindakerfi jarðar,
loftslagsbeltum jarðar,
tengslum veðurfars og gróðurbelta og tengslum veðurfars og landslags,
ýmsum veðurfarslegum fyrirbærum,
hafstraumum og blöndun sjávar með láréttum og lóðréttum hafstraumum,
loftslagsbreytingum af manna völdum.
Nemandi skal hafa öðlast leikni í að:
greina ský og nýta skýjamyndanir til að spá fyrir um veður,
greina veðurkort,
fjalla um veðurlag út frá stöðu veðurkerfa í nánd við Ísland,
fjalla um ástand sjávar og mikilvægi þess fyrir lífríkið.
Nemandi skal geta hagnýtt þá almennu þekkingu og leikni sem hann hefur aflað sér til að:
leggja mat á veðurfræðilegar upplýsingar sem nýtast í daglegu lífi,
meta mögulegar veðurfarslegar ógnir,
leggja mat á upplýsingar um veðurfyrirbæri,
greina samhengi og áhrif lifnaðarhátta mannsins á loftslag,
meta þau áhrif sem hafið hefur á daglegt líf okkar t.d. hvað varðar veðurfar, sjávarföll og strauma,
leggja rökstutt mat á umfjöllun um loftslagsbreytingar á jörðinni og þær leiðir sem eru vænlegar til að hafa áhrif á þær.