Í áfanganum er fjallað almennt um íþróttaiðkun barna og unglinga og þá aðila sem sjá um og skipuleggja íþróttaiðkun þeirra. Einnig er farið í mikilvægi uppbyggingar íþróttastarfs og íþróttafélags, sérstaklega hvað varðar topp og breidd og hlutverk þjálfara/leiðbeinenda. Nemendur fá innsýn í uppeldis-, sálfræði- og kennslufræðilega þætti sem tengjast íþróttum. Fjallað er um aga og forvarnir, t.d. hvað varðar áfengis- og tóbaksneyslu og einelti, til að koma í veg fyrir brottfall barna og unglinga úr íþróttum. Nemendur kynna sér rannsóknir á kynjamun í tengslum við íþróttaiðkun og eiga að geta rætt fordómalaust um þær sem og keppnis- og áhugamannaíþróttir, hóp- og einstaklingsíþróttir. Lögð er áhersla á mikilvægi foreldrastarfs en jafnframt fjallað um kosti þess og galla. Meginmarkmið áfangans er að nemendur átti sig á hlutverki íþrótta í lífi barna og unglinga innan samfélagsins.
Engar
Nemandi skal hafa öðlast þekkingu og skilning á:
uppeldislegu gildi íþróttastarfs fyrir börn og unglinga
hlutverki þjálfara
skipulagningu íþróttakennslustundar
þáttum sem geta komið í veg fyrir brottfall úr íþróttum
kynjamun i íþróttastarfi
þáttum sem geta stutt við jákvætt foreldrasamstarf
Nemandi skal hafa öðlast leikni í að:
skipuleggja kennslustund í íþróttum með börnum
lesa og skilja umfjöllun um uppeldis-, sálfræði- og kennslufræðilega þætti í tengslum við íþróttastarf barna og unglinga
skilja mikilvægi þjálfarans í íþróttastarfi barna og unglinga
greina einkenni samskipta- og agavandamála
tjá sig i kennslustund í íþróttum með börnum sem og í ræðu og riti
Nemandi skal geta hagnýtt þá almennu þekkingu og leikni sem hann hefur aflað sér til að:
gera sér grein fyrir einstaklingsmun í tengslum við íþróttaiðkun barna og unglinga og samspili þess við kröfur og stefnu þjálfara og íþróttafélags
sýna skilning á mikilvægi þjálfarans í augum barnsins - geta sett sig í spor annarra
afla sér frekari upplýsinga og finna leiðir til að koma samskipta- og agavandamálum í farsælan farveg