Í áfanganum verður lögfræði sem fræðigrein kynnt og fjallað um aðferðafræði og
mikilvæg grundvallarhugtök lögfræðinnar. Gerð verður grein fyrir helstu réttarsviðum
lögfræðinnar, þar sem einkum verður fjallað um sifja- og erfðarétt, refsirétt,
skaðabótarétt, eignarrétt, kröfurétt, Evrópurétt og stjórnskipunar- og stjórnsýslurétt
auk þess sem grunnreglum íslensks réttarfars verða gerð góð skil, bæði reglum
einkamálaréttarfars og opinbers réttarfars. Farið er yfir lögfræðilega túlkun og
skýringar á lögum og reglugerðum auk fordæmisgildis dóma með það að markmiði
að nemandinn öðlist færni í því að greina réttarstöðu aðila í margvíslegum aðstæðum
ólíkra réttarsviða. Áfanginn er símatsáfangi og mun námsmatið byggjast á
verkefnavinnu nemenda og áfangaprófum. Kennsluhættir verða í formi fyrirlestra,
verkefnavinnu, úrlausna raunhæfra verkefna og túlkunar á dómum auk þess sem gert
er ráð fyrir vettvangsferðum nemenda til Alþingis og héraðsdóms Reykjavíkur.
Markmið áfangans er að veita nemendum góða innsýn í aðferðafræði lögfræðinnar
og er ætlað að hafa hagnýtt gildi til að veita nemendanum þá grundvallarfærni og
þekkingu sem þörf er á til þess að geta túlkað og metið lög. Áfanginn er
undirbúningur fyrir framhaldsnám í lögfræði.
Engar
Nemandi skal hafa öðlast þekkingu og skilning á:
helstu hugtökum lögfræðinnar á þeim réttarsviðum sem til umfjöllunar eru
þeim ólíku réttarheimildum og lögskýringargögnum sem stuðst er við í íslenskum rétti
hlutverki og framkvæmd löggjafans við lagasetningu
hlutverki dómstóla við túlkun réttarheimilda
helstu kenningum við lögskýringar og túlkun laga
þeim lögum og réttarreglum sem gilda á þeim réttarsviðum sem til umfjöllunar eru
Nemandi skal hafa öðlast leikni í að:
greina lögfræðileg álitaefni á þeim réttarsviðum sem til umfjöllunar eru
lesa lögfræðilegan texta og túlka merkingu hans
leita og afla sér upplýsinga í lagasafni Alþingis og reglugerðarsafni Stjórnarráðsins
leita og afla sér upplýsinga í þeim lögskýringargögnum sem aðgengileg eru á internetinu
leita og afla sér upplýsinga í dómasafni héraðsdóma og Hæstaréttar
beita aðferðarfræði lögfræðinnar við að slá réttarreglum föstum
skrifa lögfræðilegan texta sem styðst við rökstuðning réttarreglna
Nemandi skal geta hagnýtt þá almennu þekkingu og leikni sem hann hefur aflað sér til að:
túlka og skýra réttarheimildir að því marki að slá réttarreglum föstum
greina réttarstöðu aðila samkvæmt íslenskum rétti á ólíkum réttarsviðum
leysa úr lögfræðilegum álitaefnum og komast að lögfræðilegri niðurstöðu
semja og túlka samninga og önnur lögfræðileg skjöl á ólíkum réttarsviðum
taka virkan þátt í gagnrýnni umræðu um lög og lagasetningu í íslenskum rétti.