Í áfanganum verður fjallað um sögu Kalda stríðsins frá lokum síðari heimsstyrjaldar
fram til ársins 1991 og gerð grein fyrir áhrifum þess á þá heimsmynd sem við nú
búum við. Fjallað verður um hugmyndafræðileg átök stórvelda Bandaríkjanna og
Sovétríkjanna og einstökum tímabilum í sögu Kalda stríðsins gerð góð skil, þar sem
skiptust á harðnandi deilur og friðarumleitanir. Fjallað verður um upphaf og endalok
Kalda stríðsins, skiptingu heimsbyggðarinnar milli átakaaðilanna, hernaðarbandalög
stórveldanna, staðgenglastríðin og járntjaldið í Evrópu, baráttu hagkerfa
kommúnisma og kapítalisma, kjarnorkuvána, vígbúnaðar- og geimferðakapphlaupið
auk áhrifa Kalda stríðsins á þróun ríkja og samfélaga um gervallan heim. Meðal
einstakra efnisþátta verða m.a. staðgenglastríðin í Kóreu, Víetnam og Afganistan,
deilurnar um Berlín og Kúbu, uppreisnir og andóf í Evrópu, uppgangur nýrra stórvelda Kína og Indlands sem og barátta uppreisnar- og skæruliðaafla í Suður-Ameríku, Asíu og Afríku undir merkjum sósíalisma.
SAGA2MN5
Nemandi skal hafa öðlast þekkingu og skilning á:
helstu sögulegum atburðum og átökum á tímum Kalda stríðsins
hugtakinu ógnarjafnvægi í samskiptum stórvelda og áhrifum þess
þeim ólíku hugmyndafræðilegu stjórnmálastefnum sem höfðu áhrif á tímabilinu
hugmyndafræðilegri baráttu kommúnískra og kapítalískra samfélaga á tímabilinu
efnahagsþróun tímabilsins í samfélögum Vesturlanda, Sovétríkjanna og á áhrifasvæðum þeirra
einkennum og sögu Sovétríkjanna, Bandaríkjanna og Evrópuríkja á tímabilinu
áhrifum Kalda stríðsins á alþjóðasamskipti og stjórnmálabaráttu í ólíkum heimshlutum
þeim alþjóða- og ríkisstofnunum sem höfðu áhrif á þróun Kalda stríðsins
helstu persónum sem höfðu áhrif á þróun Kalda stríðsins
vígbúnaðarkapphlaupi og geimferðakapphlaupi Kalda stríðsins
Nemandi skal hafa öðlast leikni í að:
lesa fræðilegan texta á ensku um efni áfangans
afla sér upplýsinga um efni áfangans, greina þær og setja í sögulegt samhengi
meta gildi og áreiðanleika heimilda og nýta sér fjölbreyttar tegundir þeirra
nýta sér internetið og bókasöfn til þess að afla sér dýpri fræðilegrar þekkingar á ýmsum efnisþáttum áfangans
beita sagnfræðilegum aðferðum við úrvinnslu og skráningu heimilda
tjá sig í ræðu og riti um efni áfangans, rökræða efnið og geta miðlað því á fjölbreyttan máta
beita gagnrýnni hugsun og greina orsakasamhengi sögulegra atburða
Nemandi skal geta hagnýtt þá almennu þekkingu og leikni sem hann hefur aflað sér til að:
koma söguþekkingu sinni og skilningi á efninu á framfæri með fjölbreytilegum hætti
geta tekið þátt í skoðanaskiptum og rökræðum með jafningum um efni áfangans
gera sér grein fyrir orsökum Kalda stríðsins og ástæðum fyrir endalokum þess
geta ályktað um orsakasamband atburða í víðu sögulegu samhengi
meta og greina áhrif Kalda stríðsins á alþjóðasamskipti og valdajafnvægi stórvelda
geta ályktað um áhrif Kalda stríðsins á samtímaatburði og fá betri skilning á umfjöllun um alþjóðamál í fjölmiðlum
gera sér grein fyrir einkennum og hegðun stórvelda í samskiptum á alþjóðavettvangi
geta tekið gagnrýna afstöðu til samskipta stórvelda á alþjóðavettvangi og til hlutverks alþjóðastofnana.