Í þessum áfanga kynnast nemendur matargerð í nálægum og fjarlægum menningarheimum. Ætlast er til að nemendur nái tökum á matreiðslu ýmissa framandi rétta auk þess sem áhersla er lögð á hlutverk gestgjafans í matarboðum. Nemendur þurfa sjálfir, undir handleiðslu kennara, að annast innkaup, með hollustu og hagkvæmni í huga, og laga uppskriftir að vöruúrvali. Jafnframt matargerðinni kynnast nemendur þeim menningarheimum og samfélagsgerðum sem hún er sprottin úr. Það verður fyrst og fremst gert með því að nýta ýmsa kosti margmiðlunar, s. s. kvikmyndir frá viðkomandi svæðum (sem á einhvern hátt tengjast matargerð) og alls kyns kosti veraldarvefsins. Nemendur þurfa einnig, í sameiningu, að vinna stuttar kynningar á þeim löndum eða svæðum sem til umfjöllunar eru hverju sinni. Þau lönd sem verða tekin fyrir eru m. a. Ísland, Pólland, Tyrkland, Indland, Kína, Mexikó og Íran.
MAME1RE05
Nemandi skal hafa öðlast þekkingu og skilning á:
völdum fjarlægum samfélögum
ólíkum siðum við fæðuöflun og matargerð
tengslum samfélaga við matarmenningu sína
mikilvægi hollrar næringar fyrir heilbrigðan líkama
Nemandi skal hafa öðlast leikni í að:
matreiða framandi rétti
vinna með ýmiss konar gögn við matreiðslu, þ.e. matreiðslubækur og hvers kyns áhöld og tæki
greina á milli ólíkra gerða matseldar, s.s. suðu, steikingar, ofnbökunar o.s.frv.
greina á milli ólíkra menningarheima út frá ólíkum listafurðum og matseld
ástunda hagkvæm og umhverfisvæn innkaup til heimilis
Nemandi skal geta hagnýtt þá almennu þekkingu og leikni sem hann hefur aflað sér til að:
miðla almennri þekkingu sinni í umræðum og stuttum kynningum
miðla leikni sinni við matseld
auka skilning sinn á framandi menningaheimum og um leið auka skilning sinn á sjálfum sér
efla læsi sitt í víðum skilningi, þ.e. treysta kunnáttu í íslensku, auka leshraða sinn, lesa fjölbreytta texta sér til gagns og ánægju og auka færni sína til tjáningar á eigin skoðunum og samskipta við annað fólk
efla læsi á ýmiss konar upplýsingar, bæði í texta- og talnaformi
meta heimilisinnkaup út frá sjónarmiðum sjálfbærni og hagkvæmni