Farið verður í þá strauma og stefnur innan sviðslista á tuttugustu öld sem telja má til framúrstefnu. Skoðað verður hvernig sviðslistamenn og –hópar hafa hafnað ríkjandi formum og aðferðum sviðslista og leitað nýrra leiða í list sinni, t.d. með uppbroti á sviðsrými, nýjum tjáningaraðferðum leikarans og breyttu aðferðum við sköpun sviðsverka. Byrjað verður á umfjöllun um framúrstefnu við upphaf tuttugustu aldar, s.s. hjá fútúristum, dadaistum og konstrúktivistum. Þá verður horft til tilraunaleikhúss á sjöunda og áttunda áratugnum, samruna leiklistar og myndlistar í gjörningum, ‘happenings’, og tilraunamennsku á sviði dansleikhúss. Kennsla fer fram í fyrirlestrum og samræðum og er áhersla lögð á skoðun framúrstefnu sem viðbragðs við ríkjandi hefðum og samfélagslegum straumum.
SSVL1LG03
Nemandi skal hafa öðlast þekkingu og skilning á:
Helstu straumum framúrstefnu í sviðslistum á tuttugustu öld,
áhrifum andófs gegn ríkjandi hefðu á tilkomu nýrra aðferða og forma í listsköpun,
áhrifum samfélags og menningar á framúrstefnu,
mikilvægi gagnrýninnar hugsunar í umfjöllun um sviðslistamenn, verk þeirra og sögulegt samhengi.
Nemandi skal hafa öðlast leikni í að:
Njóta lista á margvíslegu formi,
nota viðurkenndar heimildir til að setja fram rökstudda skoðun,
nýta fræðilegt efni jafnt á íslensku sem erlendum tungumálum,
beita gagnrýninni hugsun í umfjöllun um strauma og stefnur í sviðslistum á tuttugustu öld,
taka þátt í umræðum um sviðslistir í eigin samfélagi.
Nemandi skal geta hagnýtt þá almennu þekkingu og leikni sem hann hefur aflað sér til að:
Mynda sér skoðun á ólíkum straumum og stefnum í sviðslistum,
tjá hugmyndir sínar og skoðanir á rökstuddan hátt í ræðu og riti,
beita gagnrýnni hugsun á markvissan hátt í umfjöllun um viðfangsefni áfangans,
vinna fræðilegt verkefni byggt á sjálfstæðri heimildavinnu.
Námsmat byggir á fjölbreyttum aðferðum nemenda við að vinna kynningarefni um niðurstöður sínar í áfanganum s.s. með fyrirlestra, greinargerðir, ferilmöppu, kynningarmyndböndum eða margmiðlunarefni. Matsaðferðir eru í formi jafningjamats, leiðsagnarmats og sjálfsmats.