Í áfanganum er fjallað um listasögu vesturlanda frá 1945 til dagsins í dag og forsendur sjónlista kannaðar. Fjallað verður um stöðu sjónlista í samtímanum og þær hræringar, hugmyndir og stílbrigði sem einkenna tímabilið, en samruni ýmissa listforma varð áberandi á tímabilinu. Í því samhengi er fjallað um hugtakið sviðslistir og áhrif hugmynda listamanna 20. aldarinnar á sviðslistir samtímans könnuð. Nemendur rannsaka birtingarmynd listarinnar í samhengi við tíðaranda samfélagsins s.s. með hliðsjón af stjórnarfari, fjölmiðlun, lífsgæðum, hagsmunum einstakra hópa, tísku, hefðum, hugmyndafræði og heimsmynd.
SSVL1LG03
Nemandi skal hafa öðlast þekkingu og skilning á:
Helstu stílbrigðum sjónlista frá 1945 til dagsins í dag og þeirri hugtakanotkun sem beitt er í umfjöllun um þær,
verkum leiðandi listamanna á tímabilinu og hugmyndum þeirra,
sögulegum, þjóðfélagslegum og hugmyndafræðilegum forsendum listsköpunar á tímabilinu,
þeim fjölbreytileika í listsköpun sem einkennir tímabilið, þeim nýju miðlum sem listamenn nota til að koma hugmyndum sínum á framfæri og þeim þáttum sem liggja til grundvallar þessari margbreytni,
tengslum sjónlista og sviðslista í víðu samhengi,
á hlutverki listarinnar í mannkynssögunni.
Nemandi skal hafa öðlast leikni í að:
Greina samtíma myndverk með tilliti til aðferðar, stíls, uppbyggingar, tjáningar listamannsins og eigin túlkunar,
afla sér þekkingar og heimilda um viðfangsefni sín eftir margvíslegum leiðum,
greina verk og hugmyndir listamanna samtímans og setja í sögulegt samhengi,
setja niðurstöður sínar fram á skilmerkilegan hátt með fjölbreyttum aðferðum.
Nemandi skal geta hagnýtt þá almennu þekkingu og leikni sem hann hefur aflað sér til að:
Taka þátt í gagnrýninni og greinandi umræðu um samtímalist með vísun í hugmyndir, kenningar og verk listamanna sem og fræðimanna tímabilsins,
vinna kynningarefni um listamenn, verk þeirra, hugmyndir, áhrifavalda og sögulegt samhengi á fræðilegan og listrænan hátt,
vera læs á myndmál samtímalistarinnar,
njóta verka samtímalistamanna,
miðla hugmyndum samtímalistamanna til annarra,
vinna að eigin verkum með tilfinningu og virðingu fyrir sögulegu samhengi,
varpa ljósi á samtímann eins og hann birtist í spegli listarinnar.
Námsmat byggir á fjölbreyttum aðferðum nemenda í vinnu kynningarefnis á niðurstöðum í áfanganum s.s. með fyrirlestrum, greinargerðum, ferilmöppu, kynningarmyndböndum eða margmiðlunarefni. Matsaðferðir eru í formi jafningjamats, leiðsagnarmats og sjálfsmats.