Í áfanganum er unnið að fjölmiðlun og vinnslu kynningarefnis í tengslum við menningar-viðburði sem og vinnslu á listrænu efni sem hluta af sviðsmynd. Lögð er áhersla á að efla skilning og grunnþekkingu nemenda á tækjum sem tengjast ljósmyndun og myndbandsgerð. Fjallað er um grunnatriði lýsingar og hljóðvinnslu í tengslum við kynningarefni sem og ýmis sérhæfð forrit sem notuð eru við eftirvinnslu. Nemendur fá þjálfun í meðferð þeirra tækja sem þeir eiga og nota og læra að umgangast þau af þekkingu og virðingu.
Nemandi skal hafa öðlast þekkingu og skilning á:
Þeim möguleikum sem felast í notkun kvikmynda -og ljósmyndatækni í tengslum við kynningarefni og fjölmiðlun og sem hluta af sviðsmyndum,
þeim tækjum sem hann á sjálfur og vill nota til að geta skilað af sér vel unnu fjölmiðlaefni í formi myndbanda, ljósmynda eða hljóðs,
hlutverki lýsingar og hljóðs í vinnslu fjölmiðlunarefnis,
verkefnastjórnun í tengslum við framleiðslu fjölmiðlaefnis.
Nemandi skal hafa öðlast leikni í að:
Beita skapandi hugsun við skipulagningu kynningar -og fjölmiðlaefnis,
taka birtingahæfar ljósmyndir og myndbönd,
vinna fjölmiðlaefni fyrir ólíka miðla s.s. sjónvarp, útvarp, vef og ýmis smátæki,
umgangast þau tæki sem hann á og notar með virðingu, viðhalda þeim og vera öðrum fyrirmynd í notkun tækjanna,
vinna eftirvinnslu í sinni eigin tölvu og á þeim hugbúnaði sem hann sjálfur vill nota,
vinna á sjálfstæðan og skipulagðan hátt í samstarfi við aðra.
Nemandi skal geta hagnýtt þá almennu þekkingu og leikni sem hann hefur aflað sér til að:
Taka virkan þátt í vinnslu kynningar og fjölmiðlaefnis í tengslum við menningarviðburði,
koma að vinnslu listrænna myndbanda og annars myndefnis sem hluta af sviðslistaverkum,
sækja sér frekari þekkingu og reynslu á því sviði sem hugur hans/hennar stendur til innan fjölmiðlunar,
beita lausnarhugsun í samvinnu við aðra,
njóta afraksturs vinnu sinnar í formi vel heppnaðs fjölmiðlunarefnis.
Námsmat byggir á þeim verkum sem nemandi vinnur sem einstaklingur og í hóp. Nemandi vinnur kynningarmyndbönd eða margmiðlunarefni sem einstaklingur og í hóp og er afraksturinn metinn af kennara og af hópnum. Matsaðferðir eru í formi jafningjamats, leiðsagnarmats og sjálfsmats.