Í þessum áfanga er fjallað um geðraskanir og algengustu flokka geðraskana, t.d. kvíðaraskanir, lyndisraskanir (þunglyndi og geðhvarfasýki), geðklofa, átraskanir (lystarstol og lotugræðgi), áfengissýki og lyfjafíkn. Farið er í helstu kenningar um orsakir geðraskana. Þá eru tekin fyrir helstu meðferðarform og hvað það merkir að vera andlega heilbrigður eða eðlilegur („normal“). Kynntar verða aðferðir og kenningar sem stuðla að andlegu heilbrigði. Nemendur vinna verkefni eins og hugsanaskráningu og taka viðtal við einstaklinga sem hafa reynslu af geðröskunum. Meginmarkmið áfangans er að nemendur öðlist dýpri skilning á hugtökum, kenningum og vinnubrögðum sálfræðinnar og geti beitt þeim, bæði almennt og á afmörkuð viðfangsefni.
SÁLF2IS05
Nemandi skal hafa öðlast þekkingu og skilning á:
hugtakinu heilbrigði og hvað felist í andlegu heilbrigði
helstu flokkum og undirflokkum geðraskana
mikilvægum meðferðarúrræðum
helstu kenningum um orsakir geðraskana.
Nemandi skal hafa öðlast leikni í að:
fjalla um og bera saman sálfræðileg hugtök og kenningar
greina geðraskanir og viðeigandi meðferðarúrræði í afmörkuðum tilfellum
nota heimildir á viðurkenndan hátt
nota ólík miðlunarform til að fjalla um og koma á framfæri sálfræðilegum viðfangsefnum.
Nemandi skal geta hagnýtt þá almennu þekkingu og leikni sem hann hefur aflað sér til að:
tjá sig skipulega og gagnrýnið um einstaka efnisþætti
geta tekið þátt í umræðum um sálfræðileg málefni og myndað sér skoðanir sem byggjast á gagnrýnni hugsun
afla sér upplýsinga, greina helstu atriði þeirra og hagnýta sér
geta framkvæmt einfalda rannsókn og áttað sig á helstu niðurstöðum
tileinka sér jákvæð og fordómalaus viðhorf
geti beitt öguðum vinnubrögðum, tekið ábyrgð á námi og unnið í samvinnu við aðra
geti hagnýtt heimildir til að afla sér upplýsinga um sálfræðileg viðfangsefni.
Leiðsagnarmat. Fjölbreytt verkefni metin jafnt og þétt yfir önnina. Áhersla á umsagnir sem leiða nemandann áfram. Engin skrifleg lokapróf.