Áfanginn er byrjendaáfangi og flokkast undir A1 skv. evrópska tungumálarammanum. Lögð er áhersla á 4 færniþætti tungumálakennslu: hlustun, lestur, tal og ritun. Markmiðið er að nemandi skilji algeng orð og setningar um sig og fjölskyldu sína ásamt nánasta umhverfi. Einnig að nemandi geti tekið þátt í einföldum samræðum og skrifað einfalda texta. Nemendur nota grunnbækur, lesbók og vinnubók. Einnig lesa þeir stuttar sögur og syngja. Notað er myndefni þar sem nemendur fá kynningu á landi og þjóð. Verkefni eru ýmist einstaklings- eða hópverkefni. Lögð er áhersla á notkun upplýsingatækni.
Engar
Nemandi skal hafa öðlast þekkingu og skilning á:
• almennum orðaforða í samræmi við hæfniviðmið áfangans
• nokkrum grundvallarþáttum málkerfisins
• menningu, helstu samskiptavenjum og siðum í þýskumælandi löndum
• uppbyggingu einfaldra texta
Nemandi skal hafa öðlast leikni í að:
• skilja talað mál um kunnugleg efni þegar talað er hægt og skýrt
• lesa einfalda texta sem innihalda algengan orðaforða
• taka þátt í einföldum samræðum
• skrifa einfaldan texta um þekkt efni eða áhugasvið
• beita helstu reglum um málnotkun í ræðu og riti
Nemandi skal geta hagnýtt þá almennu þekkingu og leikni sem hann hefur aflað sér til að:
• greina einfaldar upplýsingar í mæltu máli
• skilja meginatriði einfaldra texta
• tjá sig munnlega og skriflega á einfaldan hátt um efni sem hann þekkir
• taka þátt í samræðum við einfaldar aðstæður
• meta eigið vinnuframlag og stöðu
• nota upplýsingatækni og hjálpargögn í tungumálanámi
Í lok áfangans er skriflegt próf úr efni áfangans sem gildir á móti vinnu og ástundun nemandans á önninni.