Áfanginn er bæði bóklegur ( fræðilegur ) og verklegur þar sem aðaláhersla er á styrk og leiðleika og tengd verkefni.
Lögð er áhersla á verklega og fræðilega þætti kraft- og liðleikaþjálfunar. Farið er yfir mikilvægi líkamsstyrks (krafts) fyrir stoðkerfi líkamans, líkamsbeitingu og líkamsreisn. Nemendur læra að stunda kraftþjálfun sem nær til helstu vöðvahópa líkamans. Þá er komið inn á mikilvægi réttrar líkamsbeitingar við kraftþjálfun og fjölbreytta möguleika við þjálfun krafts, s.s. með eigin líkamsþunga og/eða í tækjasal. Farið er yfir mikilvægi liðleika og liðleikaþjálfunar fyrir líkamann og áhrif liðleikaæfinga á vöðva og liðamót. Nemendur taka þátt í verklegum æfingum sem þjálfa liðleika.Nemendum gefast tækifæri til að taka þátt í slökunaræfingum og umræðu um mikilvægi slökunar í nútímasamfélagi. Einnig er komið inn á algengustu íþróttameiðsli, skyndihjálp og líkamsbeitingu í daglegu lífi. Þá verður farið nánar í aðalatriði undanfarandi áfanga, þ.e. upphitun og þolþjálfun og unnið með þá þætti bæði fræðilega og verklega.
Í verklegu tímunum verður fjölbreytnin höfð að leiðarljósi – nemendur glíma við fjölbreytt verkefni sem á einn eða annan hátt tengjast þeim þáttum sem að ofan getur. Í einhverjum verklegum tímum býðst nemendum að velja sér viðfangsefni eftir áhugasviðum.
ÍÞRÓ1UÞ03
Nemandi skal hafa öðlast þekkingu og skilning á:
ólíkum þjálfunarleiðum íþrótta og heilsuræktar
helstu lögmálum kraftþjálfunar og aðferðum sem beitt er til að auka kraft
helstu lögmálum liðleikaþjálfunar og byggingu líkamans
algengustu meiðslum sem verða við íþróttaiðkun
mikilvægi réttrar líkamsbeitingar í leik og starfi
Nemandi skal hafa öðlast leikni í að:
meta eigið líkamsástand
útbúa æfingaáætlun sem miðast við að auka kraft og liðleika
hlusta á líkama sinn varðandi álag í íþróttaiðkun og minnka þannig hættu á meiðslum
nota góða vinnutækni og vinnustellingar
efla á markvissan og einstaklingsbundinn hátt líkamshreysti og þrek
stunda markvissa og fjölbreytta styrktar-, liðleika- og þolþjálfun
Nemandi skal geta hagnýtt þá almennu þekkingu og leikni sem hann hefur aflað sér til að:
taka þátt í æfingum og leikjum sem viðhalda og bæta líkamshreysti
framkvæma eigin þjálfáætlun sem miðar að því að auka kraft og liðleika
beita fyrstu hjálp í meðhöndlun meiðsla í íþróttum
gæta að bakheilsu sinni og komast þannig hjá álagssjúkdómum vegna einhæfra vinnustellinga
nýta sér upplýsingatækni við alhliða líkams- og heilsurækt og mat á eigin heilsu
Byggir á ástundun, verkefnaskilum, verklegu lokaverkefni og skriflegu lokaprófi