Unnið verður áfram með þá færni sem nemandinn hefur tileinkað sér og lögð áhersla á alla færniþætti í náminu. Markvisst verður unnið með bókmenntahugtök með það fyrir augum að nemandinn geti tjáð sig um bókmenntir á markvissan hátt. Leikrit eftir William Shakespeare lesið og greint ásamt skáldsögu frá 19. eða 20. öld. Einnig verður horft á kvikmyndir byggðar á viðkomandi bókmenntaverkum. Samfélagsmynd þessara tímabila verður skoðuð í tengslum við efnið. Mikil áhersla lögð á enskt talmál.
10 einingar á 2. þrepi
Nemandi skal hafa öðlast þekkingu og skilning á:
enskri tungu og þróun hennar frá fyrri tímabilum
ólíkum viðhorfum og samfélagsgildum fyrri alda og hvernig þau hafa breyst í tímans rás
mismunandi stefnum og straumum í leikrita- og skáldsagnagerð fyrri tíma
helstu hugtökum í bókmenntafræði
Nemandi skal hafa öðlast leikni í að:
lesa sér til fræðslu og ánægju texta sem gera miklar kröfur til lesandans, ýmist hvað varðar orðaforða og uppbyggingu eða myndmál og stílbrögð í klassískum bókmenntaverkum
greina sögulegt, félagslegt, menningarlegt eða pólitískt samhengi í bókmenntatextum
leggja gagnrýnið mat á texta, listrænt gildi hans og mismunandi stílbrögð höfunda
nýta sér fyrirlestra, umræður og rökræður um efni menningarlegs eðlis
átta sig á mismunandi málsniði og stíl í töluðu máli og undirliggjandi merkingu, viðhorfum og tilgangi þess sem talar
Nemandi skal geta hagnýtt þá almennu þekkingu og leikni sem hann hefur aflað sér til að:
beita málinu af lipurð og kunnáttu til að geta tekið fullan þátt í umræðum og rökræðum þar sem fjallað er um persónuleg, menningarleg og félagsleg umfjöllunarefni í bókmenntum,
flytja vel uppbyggða frásögn, kynningu eða greinargerð,
draga fram aðalatriði og rökstyðja mál sitt nokkuð nákvæmlega með dæmum og bregðast við fyrirspurnum
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA .