Í áfanganum verður fjallað um byggingu efnisgreina/ritsmíða. Rifjuð verða upp mismunandi hlutverk orðflokka í gerð setninga og málsgreina og hugtök sem að þessu lúta. Nemendur þjálfast í notkun hjálpargagna og heimilda til að bæta eigin texta og efla stafsetningarkunnáttu. Lesnar verða smásögur og/eða skáldsaga og farið í helstu bókmenntahugtök. Út frá sögunum verða unnin margvísleg ritunarverkefni t.d. endursagnir, útdrættir, leikgerð sögu og ritdómar. Einnig verða unnin önnur ritunarverkefni s.s. kynningar, viðtöl, atvinnuumsókn og ferilskrá. Verkefnum verður skilað ýmist í ræðu eða riti. Einnig verður lögð áhersla á ýmis konar lestur og framsögn. Í lok áfangans samþætta nemendur kunnáttu sína í framantöldum viðfangsefnum og vinna fjölbreytt verkefni að eigin vali sem reyna á frumkvæði, sköpun og sjálfstæð vinnubrögð.
Fara eftir inntökuskilyrðum skólans hverju sinni.
Nemandi skal hafa öðlast þekkingu og skilning á:
grunnhugtökum ritgerðasmíða
uppbyggingu ólíkra texta
nokkrum tegundum bókmennta og nytjatexta
helstu hugtökum sem nýtast í umfjöllun um bókmenntir
helstu málfræðihugtökum og ritreglum sem nýtast í tal- og ritmáli
orðaforða umfram það sem tíðkast í talmáli
notkun hjálpargagna og heimilda og mati á gildi heimilda
helstu atriðum sem varða framsögn
Nemandi skal hafa öðlast leikni í að:
skrifa ýmsa nytjatexta í samfelldu máli með skýrri og skipulagðri framsetningu
nýta leiðréttingarforrit og önnur hjálpargögn til að leiðrétta eigin texta
draga saman aðalatriði í fyrirlestrum og ritmáli og taka saman stuttar endursagnir
leita upplýsinga úr heimildum og nýta á viðeigandi hátt
lesa sér til gagns og gamans texta sem gera nokkrar kröfur til lesenda og skilja algengt líkingamál og orðatiltæki
beita algengustu bókmenntahugtökum
flytja eigið efni og annarra af ýmsu tagi
nota algeng stílbrögð í tal- og ritmáli
Nemandi skal geta hagnýtt þá almennu þekkingu og leikni sem hann hefur aflað sér til að:
semja stutta texta af ýmsu tagi með viðeigandi málfari
túlka og meta atburðarás og persónur í bókmenntum eða annars konar frásögnum
halda uppi samræðum og rökstyðja eigin fullyrðingar, ákvarðanir eða skoðanir á málefnalegan hátt
stunda tungumálanám t.d. með því að nýta sér orðasöfn og algengustu málfræðihugtök
beita mismunandi blæbrigðum og málsniði í tal- og ritmáli til að forðast einhæfni og endurtekningar
styrkja eigin málfærni, t.d. með því að nýta ýmis konar handbækur
vinna skapandi verkefni í tengslum við námsefnið
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.