Í námskeiðinu íslenskar kvikmyndir kynnast nemendur úrvali íslenskra kvikmynda, völdum til að sýna fjölbreytni í stefnum, söguskoðun og viðfangsefnum. Farið er í nokkur grunnatriði í kvikmyndagreiningu. Skoðað er hvernig kvikmyndir bera í sér menningu og samfélagsskoðun hvers tíma t.d. þegar kemur að kynhlutverkum. Einnig eru teknar til umfjöllunar kvikmyndaðar bókmenntir, barnamyndir og heimildarmyndir. Auk þess að fá innsýn í íslenska kvikmyndasögu og stefnur kynnast nemendur betur menningu og samfélagi Íslands gegnum myndirnar. Ætlast er til þess að nemendur taki virkan þátt í umræðum, sjái úrval þeirra kvikmynda sem fjallað er um í tímunum og vinni fjölbreytt verkefni, ýmist einir eða með öðrum. Áfanginn byggist á sex stoðum menntunar: Læsi í víðum skilningi, menntun til sjálfbærni, heilbrigði og velferð, lýðræði og mannréttindum, jafnrétti og skapandi starfi.
10 einingar á 2. þrepi
Nemandi skal hafa öðlast þekkingu og skilning á:
mikilvægum kvikmynda – og bókmenntafræðilegum hugtökum
grunnaðferðum í greiningu kvikmynda
völdum þáttum í kvikmyndasögu
hvernig kvikmyndir endurspegla viðhorf og gildi í hverju samfélagi og á hverjum tíma
hvernig kvikmyndir endurspegla kynhlutverk
helstu greinum kvikmynda og stefnum
mikilvægi þess að bera virðingu fyrir skoðunum annarra
mismunandi málsniði í kvikmyndum
Nemandi skal hafa öðlast leikni í að:
beita gagnrýnni hugsun
færa rök fyrir eigin máli
tjá sig og hlusta á aðra
skoða hvernig fjölmenningarleg viðhorf birtast í kvikmyndum
miðla skoðunum sínum og fræðilegum athugunum á skapandi hátt
flytja af öryggi og sannfæringarkrafti vel uppbyggða ræðu eða ítarlega kynningu á flóknu efni
koma frá sér efni á skýru og blæbrigðaríku máli
draga saman og nýta á viðurkenndan og gagnrýninn hátt upplýsingar úr hvers kyns heimildum, hvort sem er í ræðu eða riti og meta áreiðanleika þeirra
Nemandi skal geta hagnýtt þá almennu þekkingu og leikni sem hann hefur aflað sér til að:
greina kynhlutverk í kvikmyndum
greina uppbyggingu kvikmynda
tengja kvikmyndafræði við eigin reynslu og veruleika
nýta hugtök og aðferðir í fræðilegri umfjöllun um kvikmyndir
tjá rökstudda afstöðu við ýmsar kringumstæður
meta eigin rök og annarra
útskýra sjónarmið og taka virkan þátt í málefnalegum umræðum til að komast að vel ígrundaðri niðurstöðu
draga saman aðalatriði, beita gagnrýnni hugsun við lestur, túlkun og úrvinnslu krefjandi texta
átta sig á samfélagslegum skírskotunum og ná duldum boðskap og hugmyndum
beita málinu á viðeigandi og árangursríkan hátt við mismunandi aðstæður í ræðu og riti
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.