Í áfanganum lærir nemandinn undirstöðuatriðin í tískuteikningu. Lögð er áhersla á æfingar fyrir hlutföll, jafnvægi, hreyfingu og stöðu líkamans. Helstu teikniáhöld, litir og pappír er notað og litasamsetningar rannsakaðar. Unnið er með skyggingu og áferðarteikningu í fatnaði svo nemendur geti skapað dýpt í teikningar sínar. Einnig eru könnuð mismunandi og fjölbreytt stílbrigði við frágang teikninga, auk þess verða flatar vinnuteikningar líka kynntar til sögunnar. Hugmynda- og skissuvinna er unnin á fjölbreyttan hátt þar sem listrænn þáttur tískuteikningar er skoðaður og nemandinn hvattur til að gera tilraunir og þróa sig í átt að persónulegri túlkun og stíliseringu á teikningum sínum. Farið í frágang og uppsetningu verkefna í ferilmöppu til kynningar í lok áfangans.
MYNL2MA05, HÖTE2HU05
Nemandi skal hafa öðlast þekkingu og skilning á:
notkun teikniáhalda á fjölbreyttan hátt og mismunandi eiginleikum lita og pappírs
hlutföllum, hreyfingu og stöðu tískugínanna
mismunandi áferð og efniseiginleikum textíls í teikningu
aðferðum til að ná fram áferð og skyggingu
munstri og munsturgerð
flötum vinnuteikningum
skissuvinnu sem hluta af hugmyndavinnu
íslenskum og erlendum tískuteiknurum og hönnuðum
mikilvægi stöðugrar æfingar til að ná framförum í teikningu
mikilvægi á framsetningu og uppsetningu ferilmöppu
Nemandi skal hafa öðlast leikni í að:
nota ýmis teikniáhöld, liti og pappír á fjölbreyttan hátt
teikna tískugínur á fjölbreyttan og óhefðbundinn hátt
beita aðferðum til að ná fram skyggingu, áferð og efniseiginleikum
teikna flatar vinnuteikningar
vinna hugmyndavinnu og skissur út frá þema
útbúa hugmynda- eða þemaspjöld
kynna verk sín fyrir öðrum
skoða og kynna sér verk eftir íslenska og erlenda hönnuði og tískuteiknara
Nemandi skal geta hagnýtt þá almennu þekkingu og leikni sem hann hefur aflað sér til að:
geta teiknað fjölbreyttar tískuteikningar
nýta sér mismunandi aðferðir til að þróa með sér persónulegan stíl
setja hugmyndir sínar og teikningar upp á fjölbreyttan og skapandi hátt
vinna með hugmyndir, þema og skissur í tískuhönnun
setja fram hugmyndir og hönnun til kynningar
setja fram hugmyndir og ganga frá verkefnum í ferilmöppu
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.