Námefni áfangans eru helstu stefnur og straumar og listamenn í vesturheimi á sviði mynd-, höggmynda- og byggingarlistar frá upphafi til okkar daga. Kennsla byggist á fyrirlestrum kennara þar sem námsefnið er reifað og hugtök útskýrð. Þá eru umræður og loks verkefnavinna nemenda; úr námsefninu sjálfu eða öðru sem því tengist. Nemendur kynna sér sjálfir ýmsar tiltækar heimildir og vinna verkefni. Mikil áhersla er lögð á virkni nemenda og þátttöku í kennslustundum. Verkefni felast í rituðu máli þar sem taka skal sjálfstæða afstöðu til efnisins. Framsetning efnis er í samræmi við námsefnið, mjög myndræn.
Æskilegt að hafa tekið einn til tvo áfanga í sögu.
Nemandi skal hafa öðlast þekkingu og skilning á:
helstu stíleinkennum í mynd-, höggmynda- og byggingarlist í vesturheimi
samhengi listsköpunar frá upphafi fram á 20. öld í vesturheimi og helstu listamönnum
mikilvægi listsköpunar, menningarlegu samhengi og möguleikum sem listnám hefur upp á að bjóða
helstu hugtökum sem einkenna greinina
Nemandi skal hafa öðlast leikni í að:
meta fjölbreytilega ásýnd lista
skiptast á skoðunum um sjónlistir
vinna úr heimildum á skipulegan hátt
Nemandi skal geta hagnýtt þá almennu þekkingu og leikni sem hann hefur aflað sér til að:
fjalla um eðli lista
setja fram röksemdir fyrir skoðunum sínum
bera saman, finna tengsl, einfalda og draga ályktanir af listasögunni
nálgast verkefni á faglegan og sjálfstæðan hátt
vera læs á listmenningu og sögulega þróun hennar
stunda háskólanám í listgreinum
beita upplýsingatækni í þekkingarleit sinni
Í áfanganum er lokapróf en vinnueinkunn er gefin út frá annarprófum, smærri æfingum, fyrirlestraverkefnum nemenda og virkni nemenda og þátttöku.