Undirstöðuatriði kortagerðar eru tekin fyrir. Nemandi fær æfingu í að draga hæðarlínur og teikna þversnið. Fjallað er um alheiminn: fjarlægðir, aldur, vetrarbrautir og sólkerfið okkar, samspil jarðar og tungls ásamt mikilvægi jarðmöndulhallans. Uppruna andrúmsloftsins og hafsins eru gerð skil. Innræn öfl eru ígrunduð og þróun landrekskenninga rekin og sérstaða Íslands skoðuð í því ljósi, þ.e. yfirborð stórs möttulstróks þar sem eru að skiljast að tveir stærstu flekar heims. Jarðvarminn, nýting hans og rannsóknir á því hvernig hans er leitað eru kynntar. Farið er í flokkun á yfirborðsbergi og nemendum kynntar algengustu bergtegundir storkubergs. Útrænu öflin með vatnið sem megin verkfæri skoðuð og nemanda kynnt hvernig allt okkar umhverfi er mótað af útrænu öflunum. Að lokum er skoðað hvar hagnýt jarðefni er að finna og hvenær þau mynduðust. Nemandi vinnur sjálfstætt og í hópum að lausn verkefna. Áhersla er lögð á tengingu við umhverfi og reynsluheim nemenda.
engar
Nemandi skal hafa öðlast þekkingu og skilning á:
sköpunarkenningu nútímans – Mikla hvell
samspili jarðar, tungls og sólar
hvernig möndulhalli jarðar orsakar árstíðirnar
flekakenningunni og mismunandi flekamörkum
möttulstróknum undir Íslandi og færslu flekanna yfir honum
megineldstöðvum, móbergsfjöllum og dyngjum
almennri uppbyggingu Íslands - berglög og millilög
mótun ytri aflanna á yfirborði jarðar
hvar og hvers vegna hagnýt jarðefni finnast í ríkum mæli á eða nálægt yfirborði jarðar
Nemandi skal hafa öðlast leikni í að:
teikna þversnið gegnum landakort með hæðarlínum
skoða út frá flekakorti jarðar hvaða svæði eru virk og hver ekki
skoða muninn á dyngju og móbergsstapa
bera kennsl á helstu bergtegundir storkubergs
greina í handsýni helstu bergtegundir storkubergs
Nemandi skal geta hagnýtt þá almennu þekkingu og leikni sem hann hefur aflað sér til að:
nýta gagnrýna hugsun og sjálfstæð vinnubrögð við lausn verkefna
afla heimilda, meta þær og nýta í hagnýtum tilgangi
nýta kort m.a. til að finna breidd og lengd staðar, ákvarða landslag út frá hæðarlínum og kortalyklum
útskýra hvað veldur muninum á móbergsstapa og dyngju
sýna sjálfstæði í vinnubrögðum og bera ábyrgð á eigin námsframvindu
tengja jarðfræðina við daglegt líf og umhverfi og gera sér grein fyrir notagildi hennar
nýta námsefni og gögn á markvissan hátt
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.