Í áfanganum er lagður grunnur að aflfræði með hreyfilögmálum Newtons, varðveislu skriðþungans, eðliseiginleikum efnis og varðveislu orkunnar. Lögð er áhersla á stigstærðir, markverða stafi, óvissuútreikninga, vektorstærðir, eðlismassa, hreyfifræði, krafta, orku, þrýsting og varmaorku. Nemandi vinnur sjálfstætt og í hópum að lausn dæma og verklegra æfinga. Áhersla er lögð á tengingu við umhverfi og reynsluheim nemenda.
5 einingar í stærðfræði á 2. þrepi
Nemandi skal hafa öðlast þekkingu og skilning á:
notkun stærðfræði við lausn þrauta
SI-kerfinu og SI-einingum stærða sem unnið er með
helstu hugtökum sem notuð eru í hreyfifræði, aflfræði og varmafræði
hreyfilögmálum Newtons
varðveislulögmálum vélrænnar orku
varmaorku
Nemandi skal hafa öðlast leikni í að:
nota tölur og vigra í eðlisfræði
beita lögmálum og jöfnum við að leysa verkefni af ýmsu tagi
reikna aflfræði-, orku- og hreyfifræðiverkefni
teikna einföld tvívíð gröf sem t.d. lýsa hreyfingu eða orkunotkun
leiða út með rökrænum hætti jöfnu fyrir samband stærða frá gefnum forsendum
Nemandi skal geta hagnýtt þá almennu þekkingu og leikni sem hann hefur aflað sér til að:
sýna sjálfstæði í vinnubrögðum og bera ábyrgð á eigin námsframvindu
framkvæma verklegar æfingar, vinna úr þeim og útskýra niðurstöður þeirra
nýta námsefni og gögn á markvissan hátt
nýta aðrar greinar, sérstaklega stærðfræði við lausn verkefna
meta hvort niðurstöður útreikninga og mælinga séu raunhæfar
tengja eðlisfræðina við daglegt líf og umhverfi og gera sér grein fyrir notagildi hennar
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.