Meginefni áfangans eru föll, markgildi, diffurreikningur og kynning á diffrun. Efnisþættir sem teknir verða fyrir í áfanganum eru föll og gröf falla, veldisföll, vísisföll, lograföll, andhverf föll, samsett föll, eintæk, átæk og gagntæk föll. Markgildi, diffrun og markgildishugtakið. Skilgreining á afleiðu falls. Diffrun veldisfalla, vísisfalla, lografalla og hornafalla. Reiknireglur fyrir diffrun margfeldis, ræðra falla og samsettra falla. Samfeldni,diffranleiki falla og aðfellur. Hagnýting diffrunar við könnun falla, s.s. að finna staðbundin hágildi og lággildi, einhallabil, beygjuskil og jöfnu snertils. Notkun diffrunar við hagnýt viðfangsefni, t.d. útreikning á hraða og hröðun. Söguleg þróun. Efni áfangans skoðað með hliðsjón af sögu stærðfræðinnar. Í áfanganum er lögð áhersla á sjálfstæð og skipulögð vinnubrögð, röksemdafærslur og nákvæmni í framsetningu við lausn verkefna í stærðfræði.
Hafa lokið STÆF2RH05 og STÆF2AM05 eða sambærilegum áföngum á 2. þrepi.
Nemandi skal hafa öðlast þekkingu og skilning á:
ræðum föllum, veldisföllum, vísisföllum, lograföllum og hornaföllum
markgildum og skilgreiningu þeirra
diffrun og hagnýtingu diffrunar
fallakönnun
Nemandi skal hafa öðlast leikni í að:
nota vísis- og lograföll með mismunandi grunntölum
finna andhverfur falla og setja saman föll
nota markgildi og skilgreiningu á afleiðu falls
diffra veldisföll, vísisföll, lograföll og hornaföll og nota reiknireglur fyrir diffrun margfeldis, ræðra falla og samsettra falla
nota diffurreikning við könnun falla, einkum að finna staðbundin útgildi, einhallabil, beygjuskil, jöfnu snertils og aðfellur
teikna gröf falla og kanna samfeldni og diffranleika þeirra
sanna ákveðnar reglur
reikna hagnýt dæmi þar sem beita þarf diffrun
Nemandi skal geta hagnýtt þá almennu þekkingu og leikni sem hann hefur aflað sér til að:
skilja merkingu og tengsl hugtaka í námsefninu
velja aðferðir til að leysa verkefni og beita þeim rétt
skrá lausnir sínar skipulega og útskýra þær skilmerkilega fyrir öðrum
fylgja og skilja röksemdafærslu í mæltu máli og í texta
leysa margvísleg viðfangsefni í öðrum námsgreinum og daglegu lífi
vinna með mismunandi útfærslur reglna
skilja sannanir
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.