Í þessum áfanga er lögð mikil áhersla á að byggja upp orðaforða með lestri ýmiss konar texta. Undirstöðuatriði danskrar málfræði eru rifjuð upp. Stefnt er að því að gera nemendur færa um að skilja einfalda, almenna texta og tjá sig í ræðu og riti. Nemandinn fær þjálfun í að skilja talað mál. Dönsk menning er kynnt með það að markmiði að vekja áhuga á henni. Nemandinn fær þjálfun í að nota hjálpargögn og kennsluforrit í námi sínu. Markmið áfangans er að nemandinn auki grunnþekkingu sína í dönsku og hvernig hún nýtist honum.
Þessi áfangi er ætlaður nemendum sem ekki hafa lokið grunnskóla með fullnægjandi árangri að mati skólans
Nemandi skal hafa öðlast þekkingu og skilning á:
almennum orðaforða sem hæfir hæfniviðmiðum áfangans
mannlífi, menningu og siðum í Danmörku
grundvallarþáttum málkerfisins
notkun hjálpargagna
algengum framburðarreglum
Nemandi skal hafa öðlast leikni í að:
beita grundvallaratriðum danskrar málfræði í ritun
lesa ýmiss konar texta
hlusta á og skilja almenn samtöl
nota orðabækur, upplýsingatækni og nauðsynleg hjálpargögn í tungumálanámi
taka þátt í einföldum samtölum
Nemandi skal geta hagnýtt þá almennu þekkingu og leikni sem hann hefur aflað sér til að:
vinna með viðfangsefni sem tekin eru fyrir í áfanganum
skipuleggja nám og námsaðferðir við hæfi
þróa með sér aga og skipulögð vinnubrögð
fylgjast með einföldum frásögnum um almenn efni
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í
skólanámskrá VMA.