Í áfanganum er varpað ljósi á það hvernig maðurinn nýtir auðlindirnar en einungis sjálfbær nýting dugir til langframa. Umhverfisvernd er samofin sjálfbærri þróun en hvort tveggja er tekið fyrir. Ýmis lýðfræðihugtök eru kynnt og þjálfuð. Staðfræði er all stór hluti áfangans þar sem markmiðið er að vita hvar öll lönd heimsins liggja, þéttbýlisstaðir á Íslandi ásamt helstu fjörðum, eyjum, jöklum og leiðum. Lögð er áhersla á kortalæsi, kynnt eru helstu fyrirbærin í lofthjúpnum og hvernig vindakerfi jarðar ákvarða hvar helstu þurrka og úrkomsvæðin eru. Kynnt eru m.a. hin frjósömu jarðvegssvæði jarðar, græna byltingin og helstu gerðir landbúnaðar. Þróun landa og þróunarkvarðar eru teknir fyrir, iðnaður og viðskiptabandalög, borgvæðing og skipulagsmál. Nemandi vinnur sjálfstætt og í hópum að lausn verkefna. Áhersla er lögð á tengingu við umhverfi og reynsluheim nemenda, sjálfstæð og öguð vinnubrögð.
NÁLÆ1UN05 eða sambærilegur áfangi
Nemandi skal hafa öðlast þekkingu og skilning á:
sjálfbærri þróun
bauganeti og tímabeltum jarðar
hvernig möndulhalli jarðar orsakar árstíðirnar
ákvarðandi þáttum varðandi fólksfjölda og fólksfjölgunar- og neysluvandmálum
lýðfræðiferli, fólksfjöldapýramídum og helstu mælikvörðum á þróun landa
vindakerfum jarðar og samspili við helstu þurrka- og úrkomusvæði jarðar
Grænu byltingunni og áhrifum hennar
helstu bandalögum sem Ísland tengist eða er hluti af
helstu orsökum þéttbýlismyndunar
Nemandi skal hafa öðlast leikni í að:
ræða og miðla hvað telst til sjálfbærrar þróunar og hvað ekki
beita landakortum og rafrænum kortum til að lesa almennar upplýsingar
beita ýmsum lýðfræðihugtökum, t.d. náttúruleg fólksfjölgun, fólksfjölgun, frjósemi, ungbarnadauði, lífslíkur og þéttbýlisstig
skoða heiminn í ljósi beltaskiptingar hvað varðar þurr og vot svæði og tengsl við vindakerfi jarðar
skoða atvinnugreinar og staðarval þeirra
Nemandi skal geta hagnýtt þá almennu þekkingu og leikni sem hann hefur aflað sér til að:
tileinka sér gagnrýna hugsun og sjálfstæð vinnubrögð
afla og meta heimildir og nýta þær í hagnýtum tilgangi
nýta sér kortalykil t.d. til að finna út stærð þéttbýliskjarna, hæð og vegalengdir
útskýra lýðfræðihugtök og tengja við sjálfbæra þróun
útskýra samspil umhverfis á búsvæði og sjálfbærni
nýta námsefni og gögn á markvissan hátt
greina, hagnýta og meta upplýsingar í margskonar formi (töluðu, rituðu og/eða myndrænu)
tengja viðfangsefni áfangans við daglegt líf og umhverfi og gera sér grein fyrir notagildi hennar
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.