Áfanginn er bæði verklegur og bóklegur. Í verklega hlutanum er lögð áhersla á grunnþætti þols, styrktaræfingar og liðleika. Við þjálfun þols eru fjölbreyttar aðferðir notaðar, s.s. útihlaup/ganga, þrektæki, stöðvaþjálfun, leikir og fjölbreyttar íþróttagreinar. Í styrktarþjálfun eru ýmsar æfingar notaðar, s.s. æfingar með eigin líkamsþyngd og lyftingar í tækjasal. Við þjálfun liðleika er áhersla lögð á teygjuæfingar í lok æfinga. Við þjálfun allra framangreindra þátta er leitast við að miða æfingar við áhuga og getu hvers nemanda. Í bóklega hlutanum er fjallað um heilsu og heilbrigðan lífsstíl. Rætt er um mikilvægi hreyfingar hjá öllum aldurshópum, þó sérstaklega hjá fólki á framhaldsskólaaldri. Fjallað er um þrjú algengustu þjálfunarformin; þol, styrk og liðleika og hinar ýmsu þjálfunaraðferðir innan hvers forms ræddar. Rætt er um uppbyggingu hreyfingarlotu með áherslu á áhrif upphitunar og niðurlags á líkamann. Fjallað er um áhrif vímuefna á heilsu og líkamlegt form einstaklinga. Í áfanganum er jafnframt unnið með verkefnið „Heilsumarkmiðin mín“ þar sem nemendur fá markvissa fræðslu um hreyfingu, mataræði, svefnvenjur og andlega líðan og setja sér raunhæf og mælanleg markmið (SMART-markmið) í tengslum við þessa þætti.
Engar
Nemandi skal hafa öðlast þekkingu og skilning á:
almennum ávinningi af heilbrigðum lífsstíl
mikilvægi hreyfingar hjá sínum aldurshópi
mikilvægi upphitunar fyrir áreynslu og niðurlags eftir áreynslu
fjölbreyttum þjálfunaraðferðum sem taka til þols, styrks og liðleika
lífstílstengdum atriðum sem hafa jákvæð áhrif á andlega líðan.
Nemandi skal hafa öðlast leikni í að:
auka úthald sitt, styrk og liðleika með fjölbreyttum aðferðum sem henta áhuga hans og getu
reikna út æfingarpúls fyrir brennslu- og/eða þolþjálfun
beita aðferðum til að mæla þol, styrk og liðleika
búa til skipulagða og áhugaverða hreyfingarlotu (tímaseðil/æfingaráætlun)
setja sér SMART-markmið í tengslum við hreyfingu, mataræði, svefnvenjur og andlega líðan eftir því hvað á við um hann sjálfan.
Nemandi skal geta hagnýtt þá almennu þekkingu og leikni sem hann hefur aflað sér til að:
viðhalda eða bæta eigin líkamshreysti ...sem er metið með... mælingum á frammistöðu nemandans í kennslustundum
nýta sér möguleika til að flétta hreyfingu inn í daglegt líf sitt ...sem er metið með... æfingaáætlun
gera sér grein fyrir mikilvægi heilbrigðra svefnvenja, hreyfingar og góðs mataræðis á andlega og líkamlega heilsu ...sem er metið með... verkefnum í tengslum við „Heilsumarkmiðin mín“.
Gert er ráð fyrir leiðsagnarmati í áfanganum en það byggir á stöðugri endurgjöf kennarans um frammistöðu nemandans. Meðal námsmatsþátta verða: mælingar á frammistöðu nemandans í æfingum sem varða þol, styrk og liðleika og verkefni sem nemandi vinnur í tengslum við verkefnið Heilsumarkmiðin mín (SMART-markmið). Áhersla er lögð á góða mætingu í kennslustundir.