Í áfanganum fá nemendur kennslu í grunnþáttum ljósmyndunar. Þeir læra að taka myndir á stafræna ljósmyndavél og snjallsíma. Þeir læra á stillingar myndavéla allt frá einföldum vélum og símum til flókinna myndavéla, s.s. hvernig stilla á myndavél miðað við aðstæður og myndefni og um ýmsa möguleika er varða myndbyggingu og lýsingu. Nemendur læra að vinna með ljósmyndir í tölvu með forritinu Photoshop. Nemendur kynnast verkum íslenskra og erlendra ljósmyndara og listamanna sem vinna með ljósmyndir. Eftir vinnslu við hvert verkefni er lögð áhersla á að velja myndir frá öllum nemendum sem skoða þær með það að markmiði að nemendur þjálfist í því að ræða um myndirnar og samhengi þeirra.
Nemandi skal hafa öðlast þekkingu og skilning á:
því hvernig ljósmyndir verða til með stafrænni tækni.
mismunandi stillingum myndavéla og snjallsíma.
því hvernig vinna má með ljósmyndir í tölvu.
því hvernig starfandi ljósmyndarar og listamenn vinna með ljósmyndir.
Nemandi skal hafa öðlast leikni í að:
taka ljósmyndir á stafræna myndavél og snjallsíma og vinna með þær í tölvu.
taka mismunandi gerðir ljósmynda með þeim stillingum á myndavél eða síma sem við eiga hverju sinni.
velja ljósmyndir og skoða þær í samhengi og ræða um þær.
Nemandi skal geta hagnýtt þá almennu þekkingu og leikni sem hann hefur aflað sér til að:
vinna sjálfstætt með mismunandi ljósmyndatökur.
vinna með ljósmyndir í tölvu.
skjalfesta með ljósmyndum bæði vinnuferli við gerð myndverka sem og lokaverkin sjálf.