Í áfanganum læra nemendur helstu aðferðir við framleiðslu tví- og þrívíðra hreyfimynda og myndbanda. Nemendur kynnast fjölbreyttum vinnsluaðferðum við framleiðslu og kynningu verkefna s.s. upptökum, klippingu, myndvinnslu og notkun fjölbreyttra forrita.
Nemendur vinna verkefni þar sem lögð er mikil áhersla á góða samvinnu og/eða hópvinnu og einnig einstaklingsvinnu. Skoðuð eru verk fagmanna og listamanna sem vinna myndbönd og hreyfimyndir með þeim aðferðum sem kenndar eru í áfanganum.
Nemandi skal hafa öðlast þekkingu og skilning á:
því hvernig tví- og þrívíðar hreyfimyndir og myndbönd eru unnin.
því hvernig vinna má með fjölbreyttum aðferðum í klippiforriti, myndvinnsluforriti og forriti til hreyfimyndagerðar.
því hvernig vinna má fjölbreyttar upptökur með upptökuvél.
vinnu fagfólks við gerð hreyfimynda og myndbanda.
hinum ýmsu menntastofnunum á sviði kvikmyndagerðar.
Nemandi skal hafa öðlast leikni í að:
búa til hreyfimyndir og myndbönd.
nota klippiforrit og skal geta nýtt sér þau í áframhaldandi námi.
taka þátt í skipulagðri hópvinnu þar sem nemendur skipta með sér verkum við gerð myndbanda og hreyfimynda.
ræða opinskátt um þær hugmyndir sem hann túlkar í myndböndum sínum.
taka þátt í uppbyggilegum umræðum um hugmyndir samnemenda.
Nemandi skal geta hagnýtt þá almennu þekkingu og leikni sem hann hefur aflað sér til að:
búa til myndbönd sem eru áhugaverð og persónuleg.
fjalla um hugmyndalegan og verklegan bakgrunn verka sinna.
taka þátt í uppbyggilegri og frjórri samræðu um verk sín og annarra.