Í áfanganum er lögð áhersla á að nemendur öðlist skilning á samspili innrænna og útrænna afla sem móta Jörðina. Fræðileg umfjöllun greinarinnar verður tengd við þau ummerki sem hvarvetna eru sýnileg í landslaginu í kringum okkur og þannig reynt að skapa áhuga og skilning á umhverfinu og notagildi jarðfræðiþekkingar í leik og starfi.
Nemendur læra hversvegna og hvernig eldvirkni, jarðskjálftavirkni og jarðhitavirkni dreifist um Jörðina. Eldvirkni og jarðskjálftavirkni á Íslandi er skoðuð með gleraugum fræðigreinarinnar en einnig út frá því hvað ber að varast.
Farið er í muninn á lág- og háhitasvæðum, mismunandi nýtingarmöguleika, mengunarhættu og sjálfbærni jarðhitakerfa. Einnig tengsl vatnsorkuvinnslu og vatnabúskap landsins við þróun jökla, veðurfar og landmótun. Nemendur læra um orkuauðlindir Íslands, nýtingu orkugjafa, umhverfisáhrif og endurnýjanleika.
Við verkefnavinnu er lögð áhersla á að nemendur kynnist mismunandi tegundum korta og loftmynda, læri að lesa þau og skilja. Jafnframt að nemendur læri að lesa íslenskt landslag út frá jarðfræðilegum fyrirbrigðum og einkennum landmótunar.
5 einingar í náttúrufræði á 1. eða 2. þrepi.
Nemandi skal hafa öðlast þekkingu og skilning á:
helstu hugtökum jarðfræðinnar
uppbyggingu Jarðar og tengsl við innri varma
flekakenningunni og hvernig hún útskýrir mismunandi virkni og landslag á Jörðinni
dreifingu á jarðhitasvæðum landsins, eiginleikum þeirra og nýtingu
dreifingu á eldvirkni landsins, helstu gerðum eldfjalla og eldgosa
vatnafar, veðurfar og landmótun útrænna afla á Íslandi
mismunandi tegundum korta
Nemandi skal hafa öðlast leikni í að:
lesa í landslag á Íslandi, túlka og útskýra hvaða innrænu og útrænu öfl hafa verið að verki
lesa í jarðhita á Íslandi, túlka og útskýra dreifingu og notkun lág- og háhitasvæða
spá fyrir um hegðun eldgosa á Íslandi
spá fyrir um hegðun jarðskjálfta á Íslandi
lesa og útskýra upplýsingar af mismunandi tegundum korta og/eða loftmynda
Nemandi skal geta hagnýtt þá almennu þekkingu og leikni sem hann hefur aflað sér til að:
skilja hversvegna og hvernig eldvirkni, jarðskjálftavirkni og jarðhitavirkni dreifist um Jörðina
skilja hvar og hvernig eldvirkni og jarðskjálftavirkni á Íslandi er viðsjárverð og hvað ber að varast í því sambandi
skilja muninn á lág- og háhitasvæðum, mismunandi nýtingarmöguleikum, mengunarhættu og sjálfbærni jarðhitakerfa
skilja tengsl vatnsorkuvinnslu og vatnabúskap landsins við þróun jökla, veðurfar og landmótun
geta nýtt sér mismunandi kort og miðla við upplýsingaöflun um jarðfræðileg fyrirbrigði
Námsmat er útfært í kennsluáætlun í samræmi við skólanámskrá.