Í áfanganum vinna nemendur á síðasta námsári lokaverkefni sem byggir á fræðilegri þekkingu á tilteknu námssviði/sérgrein þeirra. Gert er ráð fyrir að nemendur velji efni tengt sinni námsbraut þótt mögulegt sé að víkja frá þeirri reglu. Nemendur fá kennslu í helstu rannsóknaraðferðum námssviðsins og þjálfun í þeim fræðilegu vinnubrögðum sem tíðkast við vinnslu og frágang slíkra rannsókna.
Ætlast er til að nemandinn spyrji gagnrýninna og rannsakandi spurninga í rannsókn sinni, tengi saman fjölbreytta þekkingu, leikni og hæfni sem hann hefur öðlast og nýti við skipulag og úrvinnslu. Mikil áhersla er lögð á sjálfstæði og skapandi vinnubrögð.
Lokaverkefnið felur jafnframt í sér að nemandinn kynni afurðina á skýran og skapandi hátt og þjálfist í að útskýra og rökstyðja rannsóknarferlið og niðurstöður. Verkefnið þjálfar þannig nemendur í sjálfstæðum vinnubrögðum, að standa fyrir máli sínu og taka ábyrgð á eigin námi.
Áfanginn gefur möguleika á þverfaglegu samstarfi.
Nemendur geta óskað eftir að gera stærra lokaverkefni til fleiri eininga.
Nemandi skal hafa lokið 150 einingum.
Nemandi skal hafa öðlast þekkingu og skilning á:
aðferðum, hugtökum og kenningum síns fræðisviðs
mikilvægi gildra rannsóknargagna og heimilda
ólíkum rannsóknaraðferðum
raunhæfri markmiðasetningu og afmörkun viðfangsefna
Nemandi skal hafa öðlast leikni í að:
skipuleggja verkefni með ábyrgum og sjálfstæðum hætti
sýna frumkvæði og skapandi nálgun
lesa fræðilegan texta á íslensku og erlendu tungumáli
vinna úr heimildum samkvæmt viðurkenndum reglum um meðferð þeirra
beita viðeigandi aðferðum við útfærslu verkefnis
tjá sig á skýran, ábyrgan, gagnrýninn og skapandi hátt um eigið verkefni
Nemandi skal geta hagnýtt þá almennu þekkingu og leikni sem hann hefur aflað sér til að:
þróa hugmyndir og sýna sjálfstæði, áræðni og innsæi við útfærslu þeirra og túlkun
greina, tjá sig um og meta eigin verkefni og annara af þekkingu, víðsýni og virðingu
nýta fyrri reynslu, þekkingu og skilning við úrlausn nýrra viðfangsefna
breyta hugmynd í afurð
Námsmat er útfært í kennsluáætlun í samræmi við skólanámskrá.