Nemendur vinna nokkur hópverkefni þar sem þeir kanna afmörkuð tímabil í mannkynssögunni erlendis og á Íslandi, hvernig ólíkar listgreinar tengjast í gegnum stíl og tíðaranda og hvernig aðstæður í samfélaginu, stjórnmál og félagslegt og fræðilegt umhverfi hefur áhrif á alla listsköpun.
Einnig verður lögð áhersla á vinnu með texta. Nemendur tileinka sér og nýta almennan orða- og hugtakaforða sem notaður er við umfjöllun um menningu og listir. Grunnhugtök verða útskýrð og sett í samhengi. Teknir verða fyrir textar þar sem fjallað er um menningartengd atriði og þeir krufnir með tilliti til orðaforða og orðalags, hugmynda og hugtaka.
Nemendur kanna hvernig sjón og sjónskynjun og heyrn og heyrnarskynjun s.s eðli ljóss og lita og eðli hljóðs og tóna hafa áhrif á mismunandi upplifun.
Nemendur læra mismunandi aðferðir við að kynna verkefni á skapandi hátt m.a. myndbandstækni þar sem klipptar eru inn myndir og tónlist.
Samræður og hópavinna skipa stóran sess í áfanganum og nemendur fá þjálfun í að skrifa texta um eigin verk og annarra þar sem orðaforðinn er nýttur.
Nemendur fara á listviðburði bæði með kennara og á eigin vegum og skila skriflegri umfjöllun um þá viðburði.
Engar
Nemandi skal hafa öðlast þekkingu og skilning á:
eðli ljóss og lita og heyrnar og tóna og hvernig þessir þættir móta skynjun okkar og upplifun á listviðburðum
samhengi listar, samfélagsgerðar og tíðaranda á völdum tímabilum í mannkynssögunni
orðræðu sem notuð er þegar fjallað er um menningu og listir
hvernig á að skipuleggja vinnu í frjálsu hópastarfi
hvernig á að skrifa faglega umfjöllun um listviðburði
Nemandi skal hafa öðlast leikni í að:
vinna rannsóknarvinnu og koma henni frá sér á fjölbreyttan hátt t.d. með fyrirlestrum, glærusýningum, rituðum texta, myndböndum eða öðrum skapandi aðferðum
skrifa texta þar sem beitt er orðfæri menningarumræðu
beita rökstuddri gagnrýni við umfjöllun um ólíka listviðburði
lesa, skilja og greina texta annarra um menningu og listir
skrifa texta þar sem fjallað er um menningu á vitsmunalegan og gagnrýninn hátt og þar sem rými er gefið fyrir tilfinningar og innsæi
Nemandi skal geta hagnýtt þá almennu þekkingu og leikni sem hann hefur aflað sér til að:
lesa og skilja texta þar sem menning er til umfjöllunar ...sem er metið með... ferilmöppu
skrifa texta um ólíka þætti menningar ...sem er metið með... verkefnum
hafa áhrif á og taka þátt í umræðu um menningu ...sem er metið með... munnlegri framsögn
fjalla um og þróa eigin sköpun ...sem er metið með... ferilmöppu
njóta og skilja listir og menningu ...sem er metið með... ferilmöppu og munnlegri tjáningu
Áfanginn er símatsáfangi þar sem nemendur skila ferilmöppu með öllum verkefnum sem ásamt ástundun og virkni í tímum og umræðum liggur til grundvallar einkunn.