Í þessum áfanga er lögð áhersla á að undirbúa nemendur fyrir frekara nám í íslensku á framhaldsskólastigi með því að fara yfir undirstöðuatriði málfræði og málnotkunar, stafsetningar, ritunar, bókmennta og tjáningar. Í málfræði- og málnotkunarhluta áfangans vinna nemendur með undirstöðuatriði málfræðinnar til þess að bæta málskilning og málnotkun. Í stafsetningarhluta áfangans vinna nemendur sérstök stafsetningarverkefni og fá þjálfun í að nýta sér handbækur og hjálparforrit til að bæta stafsetningu sína. Í ritunarþætti áfangans rita nemendur fjölbreytilega texta og fá þjálfun í byggingu ritsmíða og framsetningu röksemdafærslna og fá æfingu í að nýta sér ýmiss konar hjálpargögn, s.s. handbækur, orðabækur og leiðréttingarforrit. Bókmenntatextar sem lesnir eru í áfanganum eru valdir með það að markmiði að efla lesskilning nemenda og orðaforða. Nemendur kynnast einnig grunnhugtökum bókmennta. Í tjáningarþætti áfangans fá nemendur þjálfun í upplestri og framsögn.
Grunnskólapróf
Nemandi skal hafa öðlast þekkingu og skilning á:
orðaforða umfram þann sem sem viðhafður er í daglegu talmáli
íslenskri stafsetningu og greinarmerkjasetningu
helstu hugtökum varðandi ritgerðarsmíðar
nokkrum tegundum bókmennta og nytjatexta og helstu hugtökum sem nýtast við umfjöllun um bókmenntir
forsendum góðrar framsagnar og eðlilegrar framkomu við flutning texta.
Nemandi skal hafa öðlast leikni í að:
beita reglum um stafsetningu og greinarmerkjasetningu
nota leiðréttingarforrit og önnur hjálpargögn til að lagfæra eigin texta
skrifa ýmsar tegundir texta þar sem meginreglum málnotkunar og hefðum varðandi uppbyggingu og samhengi texta er fylgt
lesa ólíkar tegundir texta sér til gagns og ánægju
beita aðferðum sem koma að gagni við flutning framsögu.
Nemandi skal geta hagnýtt þá almennu þekkingu og leikni sem hann hefur aflað sér til að:
skrifa texta á vönduðu máli þar sem samhengis í efni er gætt ...sem er metið með... ýmsum ritunarverkefnum og/eða ritgerð
túlka og meta atburðarás og persónur í bókmenntum eða annars konar frásögnum ...sem er metið með... ritgerð
flytja framsögu á skýran og áheyrilegan hátt ...sem er metið með... munnlegum verkefnum.
Gert er ráð fyrir leiðsagnarmati í áfanganum en það byggir á stöðugri endurgjöf kennarans um frammistöðu nemandans. Meðal námsmatsþátta verður: fyrirlestur, stutt ritgerð, ýmiss konar verkefni (bæði munnleg og skrifleg, einstaklings- og hópverkefni), próf og mat á undirbúningi og þátttöku nemandans í kennslustundum á önninni.