Í áfanganum lærir nemandinn undirstöðuatriði í módel og tískuteikningu. Teiknað og mótað er eftir lifandi fyrirmynd, beinagrind og tvívíðum myndum. Nemandinn þjálfast í að umbreyta þrívíðu formi mannslíkamans í tvívíða teikningu. Lögð er áhersla á æfingar fyrir hlutföll, jafnvægi, hreyfingu og stöðu mannslíkamans og byggingu og mótun forma hans. Veitt er innsýn í þann samhljóm sem er milli módelteikningar og beina og vöðvabyggingar. Nemandinn beitir frjálsri teikningu þar sem leikur, túlkun og tjáning er í forgrunni. Hugmynda- og skissuvinna er unnin á fjölbreyttan hátt þar sem listrænn þáttur módel- og tískuteikningar er skoðaður og nemandinn er hvattur til að gera tilraunir og þróa sig í átt að persónulegri túlkun og stílfæringu teikninga. Í tengslum við verkefnavinnu skoðar nemandinn dæmi úr myndlistar- og hönnunarsögu þar sem mannslíkaminn og tískuhönnun er viðfangsefnið. Unnið er með skyggingu og áferðarteikningu í fatnaði. Fjölbreytt stílbrigði við frágang teikninga eru könnuð og flatar vinnuteikningar kynntar. Samhliða allri verkefnavinnu er nemandinn þjálfaður í notkun ýmissa teikniáhalda, lita, litasamsetninga og pappírs. Hann vinnur sjálfstætt að nánari skoðun á módeli, tískuhönnun og teiknistíl milli kennslustunda og ígrundar stöðugt verk sín í samvinnu við kennara og aðra nemendur. Unnið er með frágang og uppsetningu verkefna í ferilmöppu til kynningar.
SJÓN1TF05, SJÓN1LF05, HÖTE2HU05
Nemandi skal hafa öðlast þekkingu og skilning á:
jafnvægi, hlutföllum, hreyfingu og mótun forma mannslíkamans
samhljómi milli módelteikningar og beina- og vöðvabyggingar
aðferðum til að meta jafnvægi, hlutföll, hreyfingu og afstöðu mismunandi líkamshluta
hvað er líkt og ólíkt með módelteikngu og teikningu á tískugínum
hvernig nokkrir listamenn og tískuhönnuðir hafa unnið með mannslíkamann og fatnað í sögunni og samtímanum
mismunandi áferð og efniseiginleikum textíls og teikniaðferðum til að ná því fram bæði með og án munsturs
notkun teikniáhalda á fjölbreyttan hátt og mismunandi eiginleikum lita og pappírs
flötum vinnuteikningum
skissuvinnu sem hluta af hugmyndavinnu og mikilvægi stöðugrar æfingar til að ná framförum
mikilvægi framsetningar og uppsetningar ferilmöppu til kynningar á verkum sínum
Nemandi skal hafa öðlast leikni í að:
teikna og móta hreyfingu í mismunandi líkamsstöðu í jafnvægi og réttum hlutföllum
móta form líkamans
beita hjálparaðferðum til að meta jafnvægi, hlutföll, hreyfingu og afstöðu mismunandi líkamshluta
nota ýmis teikniáhöld, liti og pappír á fjölbreyttan hátt
teikna tískugínur á fjölbreyttan og óhefðbundinn hátt
beita aðferðum til að ná fram skyggingu, áferð og efniseiginleikum
teikna flatar vinnuteikningar
vinna hugmyndavinnu og skissur út frá þema
setja upp eigin verk og kynna fyrir öðrum
kynna sér verk listamanna og tískuhönnuða
Nemandi skal geta hagnýtt þá almennu þekkingu og leikni sem hann hefur aflað sér til að:
nýta þekkingu sína og leikni í módelteikningu til að vinna að ýmsum ólíkum verkefnum í teikningu og tískuhönnun
nýta þætti í umhverfi sínu, hugmyndir og þemu og vinna með það á eigin forsendum í módelteikningu og tískuhönnun
teikna fjölbreyttar módel- og tískuteikningar
nýta verk annarra listamanna og hönnuða sem innblástur fyrir eigin verk
ígrunda verk sín og vinnuferli og taka virkan þátt í umræðu um verk sín og annarra
nýta sér mismunandi aðferðir til að þróa með sér persónulegan stíl
setja hugmyndir sínar og teikningar upp á fjölbreyttan og skapandi hátt og kynna þær
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.