Stjórnmálafræðin kynnt sem fræðigrein. Áhersla er lögð á að nemendur öðlist skilning á helstu hugtökum og hugmyndafræði greinarinnar. Helstu stjórnmálastefnur verða kynntar og greindar út frá „vinstri-hægri“ kvarðanum og lagt mat á þær út frá afstöðu þeirra til breytinga og gilda. Stiklað er á stóru í íslenskri stjórnmálasögu og einkennum hvers tímabils. Þá læra nemendur hvernig túlka má stjórnmálakerfi og stjórnmálaþátttöku út frá mismunandi kenningum með megináherslu á Ísland. Nemendum verða kynnt helstu hugtök alþjóðastjórnmála, þar á meðal hugtökin um smáríki og stór ríki. Kynnt verða helstu pólitísku alþjóðasamtök, m.a. Sameinuðu þjóðirnar og Evrópusambandið og fjallað verður um alþjóðavæðingu, einkenni hennar og möguleg áhrif á stjórnmál framtíðarinnar. Nemendur læra að leggja gagnrýnið mat á átök í stjórnmálum og að rökstyðja slíkt mat.
FÉLA2KR05
Nemandi skal hafa öðlast þekkingu og skilning á:
helstu viðfangsefnum stjórnmálafræðinnar
því hvernig stjórnkerfum og stjórnmálastefnum er ætlað að leysa samfélagsleg viðfangsefni
helstu hugtökum stjórnmálafræðinnar: Þjóðernisstefnu, stjórnkerfi, valdi, fullveldi, mannréttindum og lýðræði
íslenska stjórnkerfinu og þróun íslenskra stjórnmála
helstu stjórnmálastefnum (róttækni, frjálslyndi, íhaldsstefnu, afturhaldsstefnu, stjórnleysisstefnu og femínisma)
Nemandi skal hafa öðlast leikni í að:
beita hugtökum stjórnmálafræðinnar á raunveruleg dæmi hérlendis og erlendis
túlka íslenska stjórnkerfið og stjórnmálaþátttöku út frá ólíkum kenningum
greina vinstri-hægri kvarðann og geti staðsett málefnalega afstöðu út frá þeim kvarða
greina hlutverk fjölmiðla varðandi lýðræðisþróun og hvernig áhrifavaldar í stjórnmálum nýta sér fjölmiðla
meta þróun íslenskra stjórnmála út frá þeim hugtökum er þeir læra og geti tengt sögu íslenskra stjórnmálaflokka við helstu hugmyndakerfin
meta eigin frammistöðu og annarra á gagnrýninn hátt
Nemandi skal geta hagnýtt þá almennu þekkingu og leikni sem hann hefur aflað sér til að:
leggja gagnrýnið mat á átakaefni í stjórnmálum og að þeir geti rökstutt slíkt mat með fræðilegum vinnubrögðum
geta skilgreint áhrif stjórnmála á líf hans og aðstæður
geta tekið þátt í rökræðum um álitamál á vettvangi stjórnmálanna
verða hæfari þátttakandi í lýðræðisþjóðfélagi með virka borgaravitund
þekkja réttindi sín og skyldur sem þátttakendur í lýðræðislegu samfélagi
geta beitt öguðum vinnubrögðum, tekið ábyrgð á námi og unnið í samvinnu við aðra
vera færir um að afla sér upplýsinga um stjórnmál og geti greint helstu einkenni þeirra
Áfanginn er símatsáfangi.
Þekkingin er metin með fjölbreyttri verkefnavinnu sem að mestu leyti er unnin í tímunum.
Leiknin er metin út frá vinnubrögðum við heimildaöflun, skilningi á viðfangsefninu og því hvernig nemandi tileinar sér aðferðir við að greina mismunandi stjórnmálakerfi sem og að beita hugtökum stjórnmálafræðinnar á raunveruleg dæmi.
Hæfnin er metin úr frá þátttöku, skoðanaskiptum og rökræðu við jafninga og kennara, ásamt færni í því að leggja mat á áhrif stjórnmála í samfélaginu.