Í áfanganum er leikhúsið í víðum skilningi námsvettvangurinn. Nemendur kynnast íslensku leikhúsi og því sem það hefur upp á að bjóða hverju sinni. Þeir lesa valdar leikbókmenntir, sækja leiksýningar og fara í vettvangsferðir í tengslum við efni áfangans. Nemendur fræðast um leikrit sem sérstaka bókmenntagrein og skoða þau í samhengi við strauma og stefnur sem og víxlverkun þeirra við samtímann, samfélag og einstaklinga. Þá er lögð áhersla á að nemendur þjálfist í að mynda sér skoðun og tjá hana ásamt því að kynna sér skoðanir annarra.
Nemandi skal vera kominn á 3. þrep í íslensku
Nemandi skal hafa öðlast þekkingu og skilning á:
hugtökum sem notuð eru við greiningu leikbókmennta
formlegum og hugmyndalegum einkennum valinna leiksýninga
í hverju leikhúsgagnrýni er fólgin
Nemandi skal hafa öðlast leikni í að:
beita hugtökum bókmenntafræðinnar til greiningar á leikbókmenntum
greina, túlka og njóta sviðslista
viðra eigin hugmyndir og.setja þær fram munnlega og skriflega
Nemandi skal geta hagnýtt þá almennu þekkingu og leikni sem hann hefur aflað sér til að:
sækja leiksýningar og setja í samhengi við samfélag sitt, einstakling og samtíma
beita gagnrýninni hugsun og setja fram skoðanir sínar
frekari þátttöku í menningarsamfélagi með því að njóta leiksýninga og skyldra menningarviðburða
Í áfanganum er símat. Vinna nemenda verður metin með smærri og stærri verkefnum, leikhús- og vettvangsferðum og virkni og þátttöku í umræðum.