Í áfanganum öðlast nemandinn þekkingu á uppbyggingu og virkni mismunandi
vélagerða, þar sem áhersla er lögð á virkni, eiginleika og notkun bulluvéla. Einnig er farið yfir íhluti og einingar sem brunavél samanstendur af og hlutverk þeirra. Þá er fjallað um véla- og lagnakerfi sem þjóna brunavélum. Nemandinn þjálfast í notkun véla og vélakerfa, og lögð er áhersla á að hann sé fær um að þjóna og stjórna vélbúnaði í minni skipum. Farið er yfir öryggismál, umgengni um vélar og verkstæði ásamt hættum sem stafa af vélum og vélbúnaði.
engar
Nemandi skal hafa öðlast þekkingu og skilning á:
vinnuhring dísil- og Ottómótors
flokkun aflvéla eftir gerð, uppbyggingu og eldsneyti
grundvallarhugmyndum að baki bulluvélinni, byggingu hennar og helstu íhlutum
mismunandi uppbyggingu, notkun og eiginleikum hraðgengra og hæggengra bulluvéla
mismunandi aðstreymi eldsneytis og lofts í Ottóvél og dísilvél
þeim kerfum sem þjóna vélum skipa, hlutverki þeirra og uppbyggingu í minni skipum
kæliþörf brunavéla
uppbyggingu á eldsneytisdælum og vinnumáta þeirra
ræsingu bulluvéla, þ.m.t. mismunandi ræsiloftskerfa véla og þeim reglum sem um þau kerfi gilda
umhirðu véla og búnaðar í vélarrúmi
Nemandi skal hafa öðlast leikni í að:
nafngreina helstu íhluti vélar og lýsa hlutverki þeirra
lesa úr vélateikningum
nota helstu handverkfæri á réttan hátt
ganga um vélar og verkstæði með tilliti til hreinlætis og öryggis
undirbúa dísilvél fyrir gangsetningu og gangsetja hana
ganga frá vél og vélarrúmi eftir stöðvun og gera vélarrúm frostklárt
Nemandi skal geta hagnýtt þá almennu þekkingu og leikni sem hann hefur aflað sér til að:
teikna upp vinnuhring tvígengis og fjórgengis dísil- og Ottóvéla
rekja og teikna upp helstu vélakerfi
stunda vinnu á vélaverkstæði m.t.t. umgengni og öryggismála
undirbúa vél fyrir ræsingu og ræsa hana
útskýra bæði ytri og innri kælibúnað véla
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.