Í áfanganum vinna nemendur lokaverkefni sem byggir á fræðilegri þekkingu í hjúkrun og þarf viðfangsefnið að vera á 3. þrepi. Nemandinn dýpkar og þjálfar færni sína í ritun heimildaritgerða og fræðilegum vinnubrögðum sem krafist er við vinnslu og frágang slíkra ritgerða. Lögð er áhersla á notkun viðurkenndra heimilda innan heilbrigðisvísinda. Nemandinn vinnur undir verkstjórn kennara á sjálfstæðan hátt þar sem krafist er frumkvæðis, vandaðra vinnubragða, sköpunar og ábyrgðar á eigin námi. Nemandinn kynnir viðfangsefni sitt með margvíslegum hætti á málstofu.
HJÚK3FG05
Nemandi skal hafa öðlast þekkingu og skilning á:
tilteknu viðfangsefni sem hann hefur valið sér
helstu hugtökum sem tengjast gerð heimildaritgerðar
byggingu heimilda- og rannsóknarritgerða
nauðsyn þess að vanda meðferð heimilda
reglum um höfundarrétt og hugmyndum um ritstuld
Nemandi skal hafa öðlast leikni í að:
skrifa lokaritgerð samkvæmt viðurkenndum aðferðum
fylgja viðurkenndum reglum við gerð og frágang ritgerðar
beita gagnrýninni hugsun við úrvinnslu efnis
afla fjölbreyttra heimilda, t.d. skráðra heimilda úr bókum, tímaritum og af netinu eða frumheimilda, ef svo ber undir
koma efni á framfæri á vel uppbyggðan, skýran og greinargóðan hátt
lesa fræðilegan texta á íslensku og erlendu tungumáli
Nemandi skal geta hagnýtt þá almennu þekkingu og leikni sem hann hefur aflað sér til að:
nýta fyrri reynslu, þekkingu og skilning við úrlausn nýrra viðfangsefna
gera raunhæfa verkáætlun og framfylgja henni
setja fram rökstudda rannsóknarspurningu eða efnisyfirlýsingu
tjá sig í ræðu og riti á gagnrýninn og skapandi hátt um sérhæft efni
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.