Áfanginn er unninn á síðustu námsönn og er markmiðið að þjálfa nemendur í sjálfstæðum vinnubrögðum og efla með þeim gagnrýna hugsun og ályktunarhæfni. Nemandi velur sér viðfangsefni tengt þeirri braut sem hann hefur valið sér og skipuleggur í samráði við kennara sem leiðbeinir honum í gegnum verkefnið. Áhersla er lögð á sjálfstæð og skapandi vinnubrögð. Nemandi kynnir sér efnið til hlítar og gerir því skil í lokaverkefni sem getur verið í formi heimildaritgerðar, rannsóknarskýrslu, tölvuleikjar, myndbands, bókagerðar, heimasíðu eða annars sem nemandi og kennari koma sér saman um. Miðað er við að nemendur vinni verkefnið sem einstaklings- eða sem paraverkefni sem gefur aukna möguleika á þverfaglegu samstarfi. Í lok annar kynna nemendur verkefni sín í málstofu. Lokaverkefnið er góður undirbúningur fyrir háskólanám þar sem það þjálfar nemendur m.a. í öflun og meðferð heimilda, að meta fræðileg gögn sem tengjast viðfangsefninu, að koma þekkingu sinni á efninu fram á skýran hátt og að skrifa læsilegan texta.
Að nemandi hafi lokið 165 einingum til stúdentsprófs.
Nemandi skal hafa öðlast þekkingu og skilning á:
helstu reglum um heimildanotkun og skráningu í samræmi við APA kerfið
helstu rannsóknaraðferðum við vinnslu verkefnisins
helstu aðferðum við úrvinnslu og mat heimilda
helstu aðferðum við framsetningu efnis
Nemandi skal hafa öðlast leikni í að:
skipuleggja verkefnið með ábyrgum og sjálfstæðum hætti
sýna frumkvæði og skapandi nálgun
afla sér fjölbreytta og fræðilegra heimilda um efnið
beita viðurkenndum reglum um meðferð og úrvinnslu heimilda
tjá sig á skýran, ábyrgan og gagnrýninn hátt um eigið verkefni
taka þátt í samvinnu ef við á
Nemandi skal geta hagnýtt þá almennu þekkingu og leikni sem hann hefur aflað sér til að:
leggja fram niðurstöður sínar á aðgengilegan og skýran hátt, t.d. í heimildaritgerð, rannsóknarskýrslu, tölvuleik, myndbandi, bókagerð, heimasíðu eða með öðrum hætti þar sem gerð er grein fyrir undirbúningi, framkvæmd, úrvinnslu og niðurstöðum verkefnisins
greina, tjá sig og meta eigin verkefni og annara af þekkingu, víðsýni og virðingu
sýna frumkvæði og skapandi hugsun
takast á við ný og krefjandi verkefni
Leiðsagnarmat, sjálfsmat og jafningjamat. Til grundvallar matinu er m.a. dagbók nemanda þar sem verkáætlun er sett fram, sjálfstæði í vinnubrögðum, efnistök, málfar og stíll, meðferð heimilda, frágangur verkefnis og kynning á lokaafurð í málstofu.