Áfanginn er bæði verklegur og bóklegur.
Í áfanganum er lögð áhersla á að nemendur taki þátt í alhliða líkams- og heilsurækt. Að nemendur taki þátt í mælingum á eigin líkamsfari og fái tækifæri til að skipuleggja eigin þjálfun.
Farið er yfir helstu flokka næringarefna og mikilvægi rétts mataræðis fyrir líkamann. Einnig er skoðað hvaða skaðlegu áhrif áfengi, tóbak og vímuefni hafa á líkamann.
Fjallað er um líkamlega, andlega og sálræna þætti sem skipta máli fyrir heilsu okkar og í framhaldi skoðað hvaða þýðingu það hefur að búa við góða heilsu.
HEIL1ÞH03
Nemandi skal hafa öðlast þekkingu og skilning á:
mikilvægi grunnþjálfunar, bæði fyrir daglegt líf og sem grunn fyrir frekari þjálfun
hugtökunum snerpa, hraði, samhæfing og tækni
mikilvægi hvíldar fyrir heilsuna og til að ná árgangri í íþróttum
hvernig meta megi eigin getu út frá mismunandi mælingum og nota niðurstöðurnar til að skipuleggja eigin þjálfun
hvernig eigi að skipuleggja þjálfun, allt frá langtímaáætlun niður í einn sértækan tíma
mikilvægi góðs mataræðis fyrir heilsuna og sem hluta af þjálfun
fæðuflokkunum og hvernig við getum nálgast helstu næringarefni
hvað felist í því að búa við góða félagslega og sálræna heilsu
Nemandi skal hafa öðlast leikni í að:
nota mismunandi þrek- og styrktarpróf til að meta eigin getu
skipuleggja eigin þjálfun yfir ákveðið tímabil og fara eftir henni
skoða eigið mataræði á gagnrýninn hátt og meta hvað sé í lagi og hvað megi fara betur
Nemandi skal geta hagnýtt þá almennu þekkingu og leikni sem hann hefur aflað sér til að:
breyta og bæta eigin lífsstíl
Námsmat byggist á vinnubók sem nemendur skila, svo og á verkefnum og einu skriflegu prófi. Auk þess er mæting og virkni metin í verklegum tímum.