Farið yfir þróun vélsleða til dagsins í dag. Farið yfir mismunandi byggingarlag og fjöðrun á búkka í vélsleðum og umhirðu þeirra. Mismunandi gerðir af beltum skoðaðar og farið yfir mikilvægi þess að belti sé rétt strekkt. Farið ítarlega í vinnumáta kúplinga í stiglausu reimdrifi, áhrif mismunandi þyngda á vigtum og stífleika á gormi í fremri kúplingu skoðuð ásamt mismunandi stillingum á virkni afturkúplingar með tilliti til bakskiptingar. Farið yfir stillingar á blöndungi tvígengisvélar með tilliti til breytilegs hitastigs og loftþrýstings vegna hættu á úrbræðslu. Farið almennt yfir umhirðu vélsleða og fjórhjóla. Farið yfir drifbúnað og fjörðun fjórhjóla, t.d. öxla, mismunadrif ofl.
Að minnsta kosti 5 einingar í vélfræði/vélstjórn
Nemandi skal hafa öðlast þekkingu og skilning á:
eiginleikum stiglauss reimdrifs
aðferðum til að meta hættu á úrbræðslu tvígengisvéla
aðferðum við að stilla afstöðu vélar rétt í stiglausu reimdrifi
helstu íhlutum drifbúnaðar
Nemandi skal hafa öðlast leikni í að:
strekkja belti í vélsleða
stilla afstöðu vélar rétt í stiglausu reimdrifi
skoða kerti í vélsleða með tvígengisvél
framkvæma nauðsynlegar viðgerðir
Nemandi skal geta hagnýtt þá almennu þekkingu og leikni sem hann hefur aflað sér til að:
yfirfara kúplingar í stiglausu reimdrifi
meta hættu á úrbræðslu
meta ástand drifbúnaðar fjórhjóla
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.