Í áfanganum læra nemendur að undirbúa og sjóða MAG-suðu á stáli á eigin spýtur þar sem notaðir eru gegnheilir og duftfylltir vírar. Þeir skulu geta soðið efnisþykktir 8 – 12 mm í stál, samkvæmt gæðaflokki C (ÍST EN 25817) í plötu í opinni V-rauf, gegnumsoðið frá annari hlið í suðustöðum PA, PC og PF, soðið rör í láréttri og lóðréttri stöðu og PD-FW. Nemendur læra að sjóða eftir suðuferilslýsingum og öðlast þekkingu á afköstum og hagkvæmni mismunandi suðuvíra og aðferða. Nemendur fá einnig þjálfun í að skipuleggja suðuverkefni m.t.t. krafna um gæði, öryggi og umhverfi.
HLGS2SF04
Nemandi skal hafa öðlast þekkingu og skilning á:
suðuferilslýsingum og gildi þeirra
áhrifum mismunandi skögunar vírs á straumstyrk, afköst og innbræðslu
eiginleikum úðaboga- og stuttbogasuðu
gastegundum og gasblöndum sem notaðar eru við suðu á stáli
hlutverki hlífðargassins og stillingum þess
hlutverki duftsins í duftfylltum vírum
helstu gerðum af suðuraufum og notkun bakleggs
eiginleikum, flokkun og meðferð duftfylltra víra
mismunandi nýtingu málmfylltra víra, sjálfhlífandi víra, basískra víra og rútilvíra
helstu suðugöllum, sérstaklega þeim sem algengir eru í þykkum efnum
helstu hættum og varúðarráðstöfunum vegna geislunar, hita, ósonmyndunar, reyks, ásamt eldfimum efnum, hlífðarfatnaði og hlífum
Nemandi skal hafa öðlast leikni í að:
stilla suðutækin þ.e. straum, vírhraða, spennu og straumdempun (viðnám), þannig að hæfi efnisþykkt og suðurauf
sjóða í suðustöðum PA-BW, PA-FW, PB-FW, PF-BW, PF-FW, PC-BW og PD-FW
sjóða lárétta kverksuðu FW - PB , PD og lárétta stúfsuðu Y-rauf BW - PA með bakleggi 8-12mm
TIG sjóða botnstreng í suðustöðu PC og PF og MAG sjóða síðan yfirsuðu í suðustöðu PC og PF
undirbúa efnisrör fyrir suðu
gegnumsjóða 12 mm stálplötu öðru megin frá í PC- og PF-stöðu
sjóða eftir suðuferilslýsingum
Nemandi skal geta hagnýtt þá almennu þekkingu og leikni sem hann hefur aflað sér til að:
stilla gasflæði og velja gashulsu
meta algengustu suðugalla og orsakir þeirra
mæla og skrá viðeigandi upplýsingar varðandi suðuverkefnið s.s. forhitunarstig, raufarstærð og aðrar upplýsingar fyrir suðuferlislýsingar
velja vír m.t.t. efnis og suðuraufar
sinna viðhaldi á fylgibúnaði suðuvéla
greina helstu hættur, gera varúðarráðstafanir og nota viðeigandi öryggisbúnað
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.