Fjallað er um helstu vélarhluta brunahreyfla, tilgang þeirra og virkni. Helstu kerfi tengd brunahreyflum eins og eldsneytiskerfi, kælikerfi, smurolíukerfi, rafkerfi og rafgeyma eru kynnt og fá nemendur tækifæri til þess að vinna við þá hreyfla sem fjallað er um. Nemendur kynnast aðferðum til að meta afköst og nýtingu aflvéla og þekkja forsendur fyrir góðri endingu þeirra. Nemendur öðlast yfirsýn yfir búnað til að færa afl frá hreyflum, s.s. gírkassa, gíra, drif og stýrisvélar. Kennslan er einstaklingsmiðuð og eru öryggismál veigamikill þáttur námsins.
engar
Nemandi skal hafa öðlast þekkingu og skilning á:
öryggisatriðum við vélavinnu
mismunandi einingum brunahreyfla og hlutverki þeirra
verkfærum sem notuð eru við vélavinnu
mælitækjum sem notuð eru við mælingar á vélahlutum og vinnslustykkjum
hættum sem stafa af spilliefnum og reglum sem tengjast meðferð þeirra
hættum sem tengjast útblæstri brunahreyfla
vinnuhring brunahreyfla
vélfræðilegum hugtökum, t.d. þjappþrýstingi
helstu kerfum, s.s. smurkerfi, kælikerfi, eldsneytiskerfi, útblásturskerfi
aflrásinni og hlutverki drifbúnaðar og gíra
Nemandi skal hafa öðlast leikni í að:
beita mælitækjum með mælinákvæmni innan 0,1 mm vikmarka
mæla skrúfur og skrá tegund og stærð
taka í sundur vélahluta t.d. drif, stýrisvél, strokklok og setja saman aftur
skoða handbækur og finna upplýsingar
greina kerfi brunahreyfla og tilgang þeirra
leysa verkefni eins og þjöppumælingu, ventlastillingu og stillingu eldsneytisloka
gangsetja brunahreyfil
Nemandi skal geta hagnýtt þá almennu þekkingu og leikni sem hann hefur aflað sér til að:
gæta ávallt fyllsta öryggis þegar unnið er við brunahreyfla sem metið er með verklegum æfingum
útskýra vélfræðileg hugtök eins og þjapprými, þjappþrýsting, vinnuþrýsting, nýtni, ventlabil, þrýsting á eldsneytisloka. Þetta er metið með prófum og verkefnavinnu
vinna að uppsetningu, stillingu og viðhaldi brunahreyfla sem metið er með verkefnum og skýrslum
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.