Í áfanganum beitir nemandinn þeirri hæfni sem hann hefur aflað sér á námsbrautinni við hagnýt verkefni á vinnustað. Það er gert undir handleiðslu starfsmanns viðkomandi fyrirtækis –mentors- og fær nemandinn að glíma við verkefni við hæfi miðað við námsstöðu. Markmiðið er að kynnast sem flestum þáttum starfsins sem fyrirtækið hefur upp á að bjóða og þjálfast frekar í handverki, suðu, vélavinnu, samsetningum og almennu verklagi við framkvæmd verka. Þeir þættir sem tekist er á við eru skráðir í ferilbók sem fylgir nemandanum gegnum vinnustaðanámið, starfsþjálfun og allt að sveinsprófi.
Grunndeild málm- og véltæknigreina
Nemandi skal hafa öðlast þekkingu og skilning á:
efnum sem unnið er með í málmiðnaði
tækjum og vélum sem notaðar eru við vinnu í málm- og véltæknigreinum
meðferð spilliefna og úrgangs
kröfum sem gerðar eru til starfsmanna innan geirans
helstu aðferðum við efnistöku, suðu og samsetningar í málmiðnaði
Nemandi skal hafa öðlast leikni í að:
meðhöndla málma, vélar og handverkfæri
fylgja öryggis- og umgengnisreglum vinnustaðarins
þekkja efni, vélar og hráefni sem notuð eru í málmiðnaði
Nemandi skal geta hagnýtt þá almennu þekkingu og leikni sem hann hefur aflað sér til að:
verða hluti af liðsheild fyrirtækisins
starfa sjálfstætt að verkefnum
takast á við frekara nám og flóknari verkefni
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá VMA.